سرینگر۔ 09ستمبر (اے پی پی) بھارت نا غیرکانودی کوزہ گیری ٹی جموں و کشمیر اٹی کل جماعتی حریت کانفرنس بزرگ حریت قائد سید علی گیلانی نا کزیت آن پد بھارتی پولیس نا کنڈآن وادی کشمیر و جموں ڈیہہ نا مسلم اکثریتی علاقہ غاتے ٹی خوف و دہشت نا چاگڑد اس ودی کننگ نا ترندی اٹ مذمت ءِ کرینے۔ کشمیر میڈیا سروس نا رداٹ کل جماعتی حریت کانفرنس نا ترجمان پنچ شنبے نادے آ سرینگر اٹی جاری اسہ بیان اسے ٹی پارے کہ بھارتی غیرکانودی کوزہ گیری ٹی علاقہ ٹی پبلک ٹرانسپورٹ، موبائل و انٹرنیٹ سروس بند ءِ وخت اس کہ کوزہ گیر بھارتی فورس انا کارندہ غاک مخلوقءِ زیزاریفنگ ءُ و توہین آمیز سلوک نا شست کیرہ۔ ترجمان پارے کہ شہید راہشون سید علی گیلانی نا سیال و مخلوق ءِ دعاپاتیا کن اونا قبرآ ہِننگ نا موکل تفننگ ءِ۔ اوانسانی حق انا جہانی تنظیم تیا زور شاغاکہ او بھارتی غیرکانودی کوزہ گیرعلاقہ ٹی انسانی حق انا سنگین حالیت آتا جاچ ءِ ہلنگ کن تینا ڈل آتے ہمو علاقہ غاتیا گدریفے۔
