اقوام متحدہ۔ 08ستمبر (اے پی پی) اقوام متحدہ نا انڈر سیکرٹری جنرل انسانی امور و ایمرجنسی ریلیف کوآرڈنیٹر مارٹن گریفتھس دااومیت نا درشانی ءِ کرینے کہ اقوام متحدہ اوغانستان ءِ زمینی کسر نا کمک اٹ زوت امداد نا فراوانی بناکیک۔ اوتدو ک آدے ویڈیو کانفرنس نا کمک اٹ گپ وتران کرسا پارے کہ نن اوغانستان ءِ زمینی کسر نا کمک اٹ ایلو ملک آتیان کمکی گڑاتا فراوانی نا بناءِ کینہ ولے کمکی گڑاتا فراوانی نا چرجوئی ءِ برجاتخنگ کن پوسکن آ اوغان حکومت ءِ سیکورٹی فراوان کروئی مریک۔ انتئے کہ ننے دا چرجوئی ٹی سیکورٹی نا گرج ءِ و داڑکن اقوام متحدہ نا عہدیدار طالبان تون زبانی قول آتا جاگہ غا نوشتہی معاہدہ غا سجفنگ ءِ۔ اوپارے کہ مچ آ دنیانا کمکی تنظیم تے آجو کساس، فراوانی و مانیٹرنگ کننگ، قومی و جہانی انسانی امداد نا ورکرز و افتا خاہوت آتا رکھ و سیکورٹی نا گرج ءِ۔ اوپک کرے کہ اقوام متحدہ نا ادارہ پناہ گزین یواین ایچ سی آر نا کمشنر فلپو گرینڈی اوغانستان آ ہِننگ ءِ اومیت ءِ کہ اودے کابل آن سویلی صوبہ قندھار اسکان سفرکننگ نا موکل مریک۔ مارٹن گریفتھس پارے کہ اینخو نا سال بے چیٹی نا سوب آن 6لکھ اوغان شاری بے اُرا مسر۔ اقوام متحدہ نا عہدیدارآتا رداٹ اوغانستان نا کم وود نیمہ آبادی یا اسہ کروڑ 80لکھ بندغ آتے انسانی امداد نا گرج ءِ و اوغانستان نا مدد کن اینخوسال انا ایسر اسکان 60کروڑ 60لکھ ڈالر نا گرج ءِ۔
