اسلام آباد۔ 07ستمبر (اے پی پی) اوغانستان اٹی تعینات پاکستانی سفیر منصور احمد خان پارینے کہ کابل اٹی پاکستانی سفارت خانہ اوغان الس و درملکی تیکن ملوک ءِ۔ پیش تمنگ نا عمل کم و ود پورو مسنے، داسہ ریلیف نا کاریم تیا چکار ءِ، طالبانک باورکرفینو کہ اوغان گل زمین نئے بیرہ پاکستان بلکن اسہ ملک اسے نا ہم برخلاف کاریم اٹ بفک۔ اوغانستان اٹی امن کن سیاسی مفاہمت آ مبنی نظام نا گرج ءِ۔ سے شنبے نادے آ نجی ٹی وی چینل تون خصوصی گپ وتران کرسا اوپارے کہ پاکستان ناہمیشہ آن اوغانستان آن داخواست مسنے کہ اوغان گل زمین پاکستان نا برخلاف کاریم اٹ اتنگپ۔ ہراتم ہم داعش و ایلو دہشت گرد تنظیمک اوغان گل زمین ءِ پاکستان نا برخلاف دہشت گردی کن کاریم اٹ ایسر تو پاکستان مسکوہی اوغان حکومت ءِ نئے بیرہ سخت برانز ریکارڈ کرفیسس بلکن اوفتیان داخواست ہم کریسس کہ او تینا ملک آن دہشت گرد آتا ٹھکانہ غاتے چٹفر۔ منصور احمد خان پارے کہ پاکستان داسہ ہم تینا دا خواست آ سلوک ءِ، اوغانستان اٹی اوغان امن عمل اٹ ہم ننا طالبان آتون انگیجمنٹ ئس و ننا اوفتیان ہندا خواست مسنے کہ اوغان گل زمین ءِ پاکستان نا برخلاف دہشت گردی کن کاریم اٹ اتنگپ تو او باور کرفینے کہ اوغان گل زمین نئے بیرہ پاکستان بلکن اسہ ملک اسے نا ہم برخلاف کاریم اٹ بفک، اومیت ءِ کہ طالبان داہیت آ عمل کرسا اوغانستان آن دہشت گرد آتا ٹھکانہ غاتے چٹفنگ اٹ تینا پبی کڑد ءِ ادا کیرہ۔
