کابل۔7ستمبر (اے پی پی): طالبان ءَ نوکیں ادارُکی حکومت ءِ جار جتگ۔ محمد احسن اخوند مزن وزیر ءُ ملا عبدالغنی برادر ءُ مولوی عبدالسلام حنفی نائب مزن وزیر بنت۔ سے شمبے ءِ روچ ءَ پریس کانفرنس ءَ گوں گشتانک دیان ءَ ترجمان طالبان ذبیح اللہ مجاہد ءَ اوگانستان ءِ نوکیں کابینہ ءِ جار جنان ءَ گوشت کہ ملا احمد حسن اخوند اوگانستان ءَ نوکیں حکومت ءِ سروک بیت وھدیکہ ملا عبدالغنی برادر نائب سروک بنت۔ آئی ءَ گوشت کہ سراج حقانی وزیر ءِ تہی کار، ملا ہدایت اللہ وزیر مالیات، ملا خیر اللہ وزیر اھوالکاری ءُ دود ءُ ربیدگ، حاجی عیسیٰ وزیر پٹرولیم بنت انت وھدیکہ مولوی محمد یعقوب مجاہد وزیر ءِ دیمپانی ، ملا امیر خان متقی وزیر ءِ درئی کار بنت انت۔۔ ذبیح اللہ مجاہد ءَ گوشت کہ قاری دین محمد حنیف وزیر ءِ اقتصادی کار ، شیخ مولوی نور اللہ وزیر ءِ معارف ءُ شیخ مولوی نور محمد ثاقب وزیر ءِ حج ءُ اوقاف، نجیب اللہ حقانی وزیر ءِ رسانک، حاجی خلیل الرحمان حقانی وزیر ءِ مہاجرین، ملا عبدالطیف منصور وزیر ءِ آپ ءُ بجلی، ملا عبدالباقی وزیر ءِ وانگ ءُ زانگ، ملا حمید اللہ اخوانزادہ وزیر ءِ ٹرانسپورٹیشن ءُ بالیگ، شیخ محمد خاد وزیر ءِ امربالمعروف، ملا عبدالمعنان عمری وزیر ءِ گہبود، ملا نور اللہ نوری سیم سر ءُ قبائلی کار ءِ وزیر بیت انت۔ آئی ءَ گوشت کہ قاری فصیح الدین اوگانستان ءِ آرمی چیف بیت وھدیکہ مولوی محمد عبدالحکیم اوگان ھک رسانی ءِ سروک بیت، ملا عبدالحق وثیق این ڈی ایس ءِ سروک بیت۔ ترجمان طالبان ءَ گوشت کہ نوکیں انتظامیہ ادارُکی ات ، ایش رندتر مٹ ءُ بدل بوت کن انت۔ آئی ءَ گوشت کہ پنچ شیر ءَ دوئیں نیمگ ءَ ھون ریچی بوتگ، پنچ شیر ءَ استیں آوار جنوک آنی ھلاپ ءَ اردی ھاٹیگ کارمرز کتگ آھودے الس آناں راج ءِ گوما ھمگام کنگی انت، پنچ شیر ءَ ایمنی برجا بوتگ۔ آئی ءَ گوشت کہ حکومت ءِ جوڑیشت ءَ رنگ ءُ نسل ءَ را یک کر کنگ بوتگ۔ آئی ءَ گوشت کہ نوکیں حکومت کجام یک ٹولیگ ایگ نہ انت بلکینگ ءَ ایش سرجمیں اوگانستان ءِ سروک انت۔ آئی ءَ گوشت کہ ما 20 سال ءَ چہ اے ملک ءِ آجوئی ءِ واستہ جنگ کتگ ءُ اوگانستان ءُ ایشی ءِ الس ءِ واستہ قربانی داتگ اَنت۔
