کابل۔ 24اگست (اے پی پی) پاک اوغان جوائنٹ چیمبر ز آف کامرس اینڈ انڈسٹری نا ڈل سے شنبے نادے آ اوغان دارالحکومت کابل اٹی پاکستان نا سفیر منصور احمد خان تون اوڑدہی کرے۔ اوڑدہی ٹی اوغان پوریاگر آتے طورخم و چمن بارڈر و کراچی پورٹ آ مون تروک ویل آتیا گپ وتران کننگا۔ پاک اوغان جوائنٹ چیمبر ز آف کامرس اینڈ انڈسٹری نا صدر خان جان الکوزئی و کابل چیمبر آف کامرس نا صدر یونس مومن نا کماشی ٹی اوڑدہی کروک آ ڈل ءِ پاکستانی سفیر باوری کرفے کہ حکومت پاکستان تین پہ تینی واپار نا کچ اٹی ودکی کن اوغان پوریاگر تے پبی کمک فراوان کیک۔ پاکستانی سفیر اوفتے ہڑتوم آ کنڈآتا واپار، پاک اوغان ٹرانزٹ ٹریڈ و بینکنگ و کسٹمز نا بشخ آتے ٹی مون تروک ویل آتا ازالہ نا ہم باوری کرفے۔ پاکستانی سفیر داوخت آ پارے کہ پاکستان ہڑتوم آ ملک آتا نیام اٹ بے اڑاند واپار کن اوغانستان اٹی بروک آ پوسکن آ حکومت و نجی بشخ ہڑتوم آتون اواری اٹ کاریم کننگ کن تیار ءِ۔ پاکستانی سفیر ڈل ءِ پارے کہ ہڑتوم آ ملک آتا نیام اٹ تین پہ تینی واپار نا لامحدود وارخواہی ساڑی ءِ و داوارخواہی تے ہچ ءُ حالیت اسے ٹی زیان کننگپ۔ ڈل انا ایلو باسک آتے ٹی ببرک، خان محمد صفی، نقیب صافی و اچکزئی ئسک اوار ئسر۔
