اسلام آباد۔ 24اگست (اے پی پی) صحافتی تنظیم فورتھ پلر انٹرنیشنل، پی ایف یوجے(پروفیشنل) و ینگ جرنلسٹس ایسوسی ایشن پاکستان میڈیا ڈویلپمنٹ اتھارٹی نا برخلاف چندی ٹی وی چینل آتیا چلینگوک آ اشتہار ءِ مسترد کرسا دااسہ کنڈی میڈیا مہم نا برخلاف مسابقتی کمیشن تون رجوع کننگ نا فیصلہ کرینو۔ بنجائی وزیر حوالکاری و شینکاری چوہدری فواد حسین و وزیر مملکت حوالکاری فرخ حبیب تون چندی صحافتی تنظیم فورتھ پلر انٹرنیشنل، پی ایف یوجے(پروفیشنل) و ینگ جرنلسٹ ایسوسی ایشن نا عہدیدارآک اوڑدہی کریر۔ صحافتی تنظیم تا عہدیدار آک پاریر کہ پاکستان میڈیا ڈویلپمنٹ اتھارٹی نا بارواٹ چندی ٹی وی چینل آتیا اشتہار چلینگ انگ ءِ ہراٹی پاننگ انگ ءِ کہ غٹ صحافتی تنظیمک میڈیا ڈویلپمنٹ اتھارٹی بل ءِ مسترد کرینو۔ اوپیدوار کریر کہ غٹ صحافتی تنظیمک داسلاہ ئی بل ءِ مسترد کتنو۔ عہدیدارآک پاریر کہ مستین اٹ حکومت آک میڈیا مالک آتیان بلیک میل مرسا کرینو، پاکستان تحریک انصاف نا اسٹ انگا حکومت ءِ ہرامیڈیا ورکرآتا حق انا رکھ اکن گام ہرفے، منہ تنظیم تے میڈیا مالک آتا فائدہ غاتا رکھ کننگ نا موکل تننگ کپنہ ہنداخاطرآن دا اسہ کنڈی اشتہار و میڈیا مہم نا برخلاف مسابقی کمیشن آف پاکستان تون رجوع کینہ۔ داوخت آ گپ وتران کرسا بنجائی وزیر حوالکاری چوہدری فواد حسین پارے کہ پوسکن آ میڈیا نا غٹ آن بھلا چیلنج جعلی بیانیہ ءِ اصل بیانیہ غان جتا کننگ ءِ، ساڑی آ غٹ کانود آک ڈیجیٹل میڈیا نا انقلاب آن مست تیار مسر، داسہ موبائل فون ننا اخبار، ٹی وی و سوشل میڈیا ءِ۔ اوپارے کہ پاکستان میڈیا ڈویلپمنٹ اتھارٹی نا بارواٹ میڈیا مالک آتا اِرااعتراض ءُ کہ سوشل میڈیا و اخبار کن جتا جتا اتھارٹی مرے۔ میڈیا مالک آک گارنٹی فراوان کیر کہ سوشل میڈیا نا نیوز اخبار اٹی و اخبار نا نیوز سوشل میڈیا غا شینک مفک۔ بنجائی وزیر حوالکاری پارے کہ پاکستان میڈیا ڈویلپمنٹ اتھارٹی نا جوڑ کننگ کن نن پنچ ملک آتا کانود آتے اسٹڈی کرینن، دااتھارٹی ٹی میڈیا میڈیا کمپلینٹس کمیشن و میڈیا ٹریبونل اِراادارہ مریرہ، اوفتیا حکومت نا کنٹرول بایدے مف، تقرری تیکن جتا ءُ آزاد کمیشن اس جوڑ کننگک۔ چوہدری فواد حسین پارے کہ نن میڈیا ادارہ غاتے 70کروڑ روپئی نا زرتسونن ولے اوکان پد ہم او تینا ورکرآتے تنخواہ تفننگ ءُ۔ ڈیجیٹل ایڈورٹائزنگ نا ذکر ءِ کرسا بنجائی وزیر حوالکاری پارے کہ ہراتم 2018ء ٹی او اولیکو وار وزیر حوالکاری مس تو او وخت آ او وزارت خزانہ ءِ چھٹی اس نوشتہ کریسس کہ ڈیجیٹل ایڈورٹائزنگ ءِ خراج نیٹ اٹ اتنگے، داوخت آ دا چار ارب روپئی ئس و بیرہ مسہ سال اٹی دا 25ارب روپئی اسکان سرمسنے۔ اوپارے کہ نیٹ فلیکس و ایمازون پاکستان آن کم وود 250ملین ڈالرز وصول کیک، نن دا پلیٹ فارم تیا پاکستانی مواد اوار کننگ نا کوشست کننگ اُن۔ بنجائی وزیر پارے کہ ساڑی حکومت اولیکو وار ڈیجیٹل میڈیا کن فنڈ جتا کرینے، میڈیا ڈویلپمنٹ اتھارٹی بل انا فیک نیوز و صحافی تا حق انا بابت شق آتیا ہچ ءُ سمجھوتہ اس مفک۔ اوپارے کہ پاکستان میڈیا ریگولیٹری اتھارٹی بل انا ایلو شق آتیا سلاہ تا خیرمقدم ءِ کینہ۔
