اسلام آباد۔30مئی (اے پی پی): نائب مزن وزیر ءُ درئی کارانی وزیر سینیٹر محمد اسحاق دار ءَ کابل ءَ پاکستان ءِ ناظم الامور ءَ را سفیر ءِ تک ءَ اپ گریڈ کنگ ءِ پیسلہ ءِ جار جتگ۔ جمعہ ءِ روچ ءَ ایکس ءِ سر ءَ وتی پوسٹ ءِ تہ ءَ نائب مزن وزیر ءَ گوشت کہ اے سال ءِ 19 اپریل ءَ پاکستانی ڈل ءِ گوما کابل ءِ منی سک باز پائدگ مندیں تر ءُ تاب ءَ پد پاکستان ءُ اوگانستان ءِ نیام ءَ سیادی جوانیں رنگ ءَ روگ ءَ انت۔ آئی ءَ گوشت کہ اے رپک ءَ را برجاہ دارگ ءِ واستہ پاکستان حکومت ءِ نیمگ ءَ کابل ءَ وتی چارج ڈی افیئرز ءِ تک ءَ را سفر ءِ تک ءَ سر کنگ ءِ پیسلہ ءِ جار جنگ ءَ وشی اِنت۔ نائب مزن وزیر ءُ دری کارانی وزیر سینیٹر محمد اسحاق ڈار ءَ امیت ءِ درشانی کت کہ اے گامگیج ءَ چہ دو نیمگی سیادی گیش گیش بنت، اقتصادی، سیکورٹی، سی ٹی ءُ تجارتی شوبگ آنی تہ ءَ پاک اوگانستان ءِ کمک گیش گہتر بیت ءُ دوئیں براتیں ملک آنی نیام ءَ گیش تبادلہ ءِ دیمروئی بیت۔
