اسلام آباد۔ 24اگست (اے پی پی) وزیراعظم عمران خان ءِ آئی ایم ایف نا منیجنگ ڈائریکٹر کرسٹیلینا جارجیوا چھٹی اس مون تسنے ہراٹی اوغانستان آن تینا اسٹاف و اوفتا خاہوت آتا پیش تمنگ نا بابت مثبت کڑد آ پاکستان نا منت واری ءِ ہرفنگانے۔ منیجنگ ڈائریکٹر آئی ایم ایف اوغانستان آن پیش تمنگ نا بابت پاکستان نا اہم کڑد ءِ خراج تحسین پیش کرسا پارے کہ بھاز مشکل ساہت اٹ اوغانستان آن آئی ایم ایف اسٹاف و اوفتا خاہوت آتا حفاظت اٹ پیش تمنگ آ است انا حب اٹ منت وار اُٹ۔ منیجنگ ڈائریکٹر آئی ایم ایف کرسٹیلیا جارجیوا وزیراعظم نا پن چھٹی ٹی وزیرخارجہ، وزیر خزانہ، وزیر دفاع و گورنر اسٹیٹ بینک انا کڑد انا ہم ستاءِ کرینے۔ اوپارے کہ مشکل وخت اٹی پیش تمنگ نا بابت پاکستان نا کنڈآن بڑزکو کہول آ کروک آ کوشست آک اہم ءُ اہمیت اس تخرہ۔ اوپارے کہ پاکستان و آئی ایم ایف نا نیام اٹ پارٹنر شپ آ منت واراُٹ و داکمکاری نا چرجوئی نا خواہندار اُن۔ کرسٹیلینا جارجیوا وزیراعظم عمران خان و پاکستانی الس کن نیک است خواہی تا ہم درشانی ءِ کرے۔
