دوشنبے۔30مئی (اے پی پی):مزن وزیر محمد شہباز شریف دو روچی تر ءُ تاب ءِ سرجم کنگ ءَ پد تاجکستان ءِ بنجاھی شہر دوشنبے ءَ چہ وطن ءَ واتر بوتگ۔ تاجکستان ءِ نائب مزن وزیر حکیم خلیق زادہ ءَ دوشنبی بالی پٹ ءَ مزن وزیر ءَ چہ الوداع کت۔ مزن وزیر ءِ ھمبراھی ءَ وفاقی وزیر ءِ اھوالکاری ءُ شنگکاری عطا اللہ تارڑ ءُ ھاسیں کمکار سید طارق فاطمی ھم ھوار بوتگ اَنت۔ تاجکستان ءِ دو روچی تر ءُ تاب ءِ ساھت ءَ مزن وزیر محمد شہباز شریف ءَ تاجکستان ءِ صدر امام علی رحمان ءَ گوں گند ءُ نند کتگ، ایشی ءِ تہ ءَ مزن وزیر ءَ تاجکستان ءِ صدر ءَ گوں پاکستان ءُ تاجکستان ءِ نیام ءَ جتا جتائیں پڑ آنی تہ ءَ کمک ءِ ھوالگ ءَ گپ ءُ تران کتگ ءُ جنوبی ایشیائی پڑ ءَ بھارت ءُ پاکستان ءِ نیام ءَ استیں کشاں چیل ءِ ساھت ءَ تاجکستان ءِ نیمگ ءَ چہ پاکستان ءِ گیشاں چہ گیش کمک ءِ پد ءَ تاجک صدر ءِ شگر ءُ منت واری گپت۔ مزن وزیر محمد شہباز شریف ءَ اے تر ءُ تاب ءِ ساھت ءَ دوشنبی ءَ برجم داشتگیں گلیشیر ءِ رکھینگ ءِ ھوالگ ءَ میاں اوستمانی کانفرنس ءَ بھر زوری کتگ ات، ایشی ءِ تہ ءَ مزن وزیر ءَ موسمی بدلی ءِ پاکستان ءِ سر ءَ آسر ءُ ایشی ءِ رکھینگ ءُ گلیشیر ءِ رکھینگ ءِ واستہ پاکستان ءِ بے مٹیں جزم ءِ بابت ءَ ھواریں مردماں سرپدی دات۔
