واشنگٹن۔ 23اگست (اے پی پی) امریکہ ٹی پاکستان نا سفیر اسد مجید خان امریکی کانگریس نا ریپبلکن باسک مائیک والٹز نا دادعویٰ ءِ مسترد کرینے ہراٹی اوپارینے کہ پاکستانی فوج انا حکمت عملی اوغان فوج انا طالبان تا دوتے ٹی شکست نا سوب جوڑ مسنے۔ اوامریکی کانگریس نا باسک مائیک والٹز نا پن نوشتہ کروک آ چھٹی ٹی پارینے کہ حقیقت اٹ پاکستان و امریکہ اوغان ویل انا سیاسی ایسری کن اواری اٹ کاریم کرسا کرینو و ہڑتوم آ ملک آتا بنداوی است خواہی داہیت ءِ پک کننگ اٹی ءِ کہ اوغانستان دُوارہ دہشت گرد پڑک آتا جاگہ جوڑ مف۔ پاکستانی سفیر اوغانستان اٹی خذمت سرتروک آ مسکوہی امریکی فوجی آفیسر مائیک والٹز نا امریکی صدر جوبائیڈن نا پن نوشتہ کروک آ داچھٹی آ ردعمل نا درشانی ءِ کرے ہراٹی مائیک والٹز اوغانستان اٹی صدر اشرف غنی نا حکومت نا چٹنگ آن پد دعویٰ کرینے کہ پاکستانی فوج انا تروک آ حکمت عملی اوغان فوج انا طالبان تا دوتے ٹی شکست نا سوب جوڑ مسنے۔ پاکستان نا سفیر اسد مجید خان پارینے کہ بھلا بدبختی نا ہیت دادے کہ مائیک والٹز چھٹی ٹی اوغانستان اٹی پاکستان نا کڑد ءِ غلط وڑاٹ پیش کرینے۔ اومائیک والٹز ءِ مخاطب کرسا پارے کہ فوجی ملازمت کروک آ ہربندغ چاہک کہ کرپٹ و عیاش سرکڑدہ ئی ٹی فوجی دل برداشتہ مریرہ و اوفتے ٹی دشمن تون جنگ تننگ نا جوزہ ہم چٹک۔
