اسلام آباد۔28جولائی (اے پی پی): بلوچستان ءِ دمگ ماں کوہلو ءَ منشیات ءِوبا ءَ چہ ورناہ آنی زند تباہ بوہگ ءَ اَنت، منشیات ءِ بہا ءُ سیمءَ ورناہ آنی زند پہ بربادی ءُ ویریندانی ء ِ نیمگ ءَ رہادگ کتگ اَنت۔ بی آئی سی ٹی ءِ جنرل سیکرٹری اینڈ وائس پریزیڈنٹ نصراللہ مری ءَ چار شمبے ءِ روچءَ گوں اے پی پی ءَ گپ ءُتران کتگ ءُ گشتگ کہ بلوچستان ءِ دمگ کوہلو آباتی ءِ ھساب ءَ باز کسانیں شہر اِت بلے اِد ءَ ورناہ روچ پہ روچ منشیات ءِ آماچ بوہگ ءَاَنت۔ آئی ءَ گشتگ کہ یک سروے رپورٹ ءِ ردءَ اے وہدءَ کوہلو ءَ 7000 ءَ چہ گیش مردم منشیات ءِ آماچ اَنت۔ آئی ءَ گشتگ کہ مات ءُ پت ہم پہ وتی چکانی ھاترءَ پریشان اَنت، لوگانی تہا مڑ ءُ جنگ ہم ہمیں منشیات ءِ سوب ءَ بوہگ ءَ اَنت۔ آئی ءَ گشتگ کہ کوہلو ءِ مردماں مزنیں احکام ءَ گوں دزبندی کتگ کہ کوہلوءَ منشیات ءَ را گرءُدار کنگ ءِھاترءَ گامیگج چست کنگ بہ بیت۔ آئی ءَ گشتگ کہ ورناہ آناں چہ منشیات ءَ چہ دور کنگ لوٹ ایت تنکہ آ وتی ملک پاکستان ءِ جوانیں شہری جوڑ بہ بنت ءُ وتی ماتیں وطن پاکستان ءِ ازمت ءَ بہ کن اَنت۔
