اسلام آباد۔ 27جولائی (اے پی پی) صدر مملکت ڈاکٹر عارف علوی ملکی زرگزرانی و سائنسی شونداری کن انفارمیشن ٹیکنالوجی نا بشخ اٹی شونداری کن فعال گام گیج چست کننگ آ زور شاغسا پارینے کہ جہانی کہول آ شونداری پالیسی تا فوکس شونداری ڈٹ آتیان انسانی وسیلہ غاتا فکری شونداری نا کنڈآ ہِننگ ءِ، پاکستان ءِ انسانی وسیلہ غاتا سائنسی و فکری شونداری کن پوسکن ءُ حکمت عملی اس کننگ نا گرج ءِ۔ اوسے شنبے نادے آ نیشنل یونیورسٹی آف کمپیوٹر اینڈ ایمرجنگ سائنسز (این یوسی ای ایس) نا بابت بریفنگ دیوان نا کماشی ءِ کریکہ۔ ریکٹر نیشنل یونیورسٹی آف کمپیوٹراینڈ ایمرجنگ سائنسز ڈاکٹر ایوب علوی صدر مملکت ءِ حوال تس۔ دیوان اٹی چانسلر این یو سی ای ایس وسیم سجاد، سیکرٹری جنرل فاؤنڈیشن ایڈوانسمنٹ آف سائنس اینڈ ٹیکنالوجی غلام شبیر، باسک بورڈ آف ٹرسٹی ڈاکٹر یواے جی عیسانی و بورڈ آف گورنرز نا باسک ڈاکٹر ثمر مبارک مند، جسٹس (ر) میاں محمد اجمل، احمد فاروق و قیصر احمد شیخ ئسک بشخ ہلکر۔ ریکٹر این یو سی ای ایس ملک اٹ انفارمیشن ٹیکنالوجی نا تعلیم نا مون آ دننگ اٹ یونیورسٹی نا کڑد و کارنامہ غاتا بابت پریزنٹیشن تس۔ اوپارے کہ این یوسی ای ایس ملک انا کمپیوٹر سافٹ ویئر انڈسٹری ءِ انسانی وسیلہ فراوان کروک آ غٹ آن بھلا ادارہ ءِ و داوخت آ یونیورسٹی نا پنچ کیمپس آتے ٹی 13,000طالب علم، جتا پروگرام تیٹی خواننگ ءُ۔ اوپارے کہ سال 2000آن ہلیس داتم اسکان 24,000طالب علم کمپیوٹرسائنس، انجینئرنگ، مینجمنٹ و ہیومینٹیز کون آ چندی بشخ آتے ٹی گریجویشن کرینو۔ ریکٹر داہم پارے کہ ادارہ ضرورت مند و ہُشار طالب علم آتے ہرسال 240ملین روپئی نا امداد و وظیفہ فراوان کیک، داوخت آ 1,500طالب علم یونیورسٹی نا تروک آ مالی امداد آن فائدہ ہرفنگ ءُ۔ داوخت آ صدر مملکت تعلیم نا مون آ دننگ اٹ یونیورسٹی نا کڑد و کارکڑد انا ستاءِ کرے و نجی بشخ اتون کمکاری ءِ مون آ دننگ نا گرج آ زور شاغا، اوپارے کہ ملک انا شونداری کن اکیڈمیہ و انڈسٹری نا نیام اٹ رابطہ المی ءِ۔ اوہائبرڈ و آن لائن تعلیم نا فراوانی آ خاص چکار اتون طالب علم آتا کچ ءِ ودفنگ نا گرج آ ہم زور شاغا۔ صدر یونیورسٹی انتظامیہ غا زور شاغا کہ چارمیکو صنعتی انقلاب نا گرج آتے مون آ تخسا طالب علم آتے تیار کننگے و پٹ وپول و شونداری آ چکارکننگے۔
