اسلام آباد۔ 27جولائی (اے پی پی) پاکستان و سعودی عرب اقتصادی، زرکاری و دودوربیدگی و سفارت کاری تون اوار چندی بشخ آتے ٹی کمکاری ءِ مون آ دننگ، ہڑتوم آ کنڈآتا تعلقداری نا سوگوی کن بڑزکو کہول انا رابطہ غاتا چرجوئی و پاک سعودی وزارت خارجہ ٹی فوکل پرسن تعینات کننگ آ امنا کرینو۔ سعودی عرب و پاکستان نا تین پہ تینی تعلقداری نا مون آ دننگ کن سعودی۔پاکستان بڑزکو سلابتی کونسل اس جوڑ کننگ نا ہم فیصلہ ءِ کننگا۔ سے شنبے نادے آ پاک سعودی وزیرخارجہ غاتا نیام اٹ ڈل آتا کہول آ مذاکرات آن پد سعودی ہم منصب شہزادہ فیصل بن فرحان آل سعود تون اوار اسیجائی پریس کانفرنس آن تران کرسا وزیرخارجہ شاہ محمود قریشی پارے کہ ننا سعودی عرب تون تعلقداری دیرینہ و تاریخی ءِ، مخدوم شاہ محمود قریشی پارے کہ ننا ہڑتوم آ کنڈآتا و ڈل آتا کہول آ مذاکرات مس، نن اقتصادی رابطہ غاتا مون آ دننگ، زرکاری ءِ ودفنگ آ خاص گپ وتران کرین۔ شاہ محمود قریشی پارے کہ سعودی عرب و پاکستان نا تین پہ تینی تعلقداری نا مون آ دننگ کن سعودی۔پاکستان بڑزکو سلابتی کونسل اس جوڑ کننگ نا ہم فیصلہ ءِ کننگانے۔ وزیرخارجہ پارے کہ درو داڑے پاکستان و سعودی عرب نا نیام اٹ سپریم کوآرڈینیشن کونسل نا سٹرکچر آ مذاکرات مس، سپریم کونسل نا کاریم نا وڑوڈول آ گپ وتران مس، دابابت ہڑتوم آ ملک آتا وزارت خارجہ ٹی فوکل پرسن تا تعین ءِ کننگک تانکہ ننتون تینا تین پہ تینی تعلقداری تے ہُننگ کن اسہ اسٹرکچرڈ و ادارہ جاتی کسر اس مرے۔ شاہ محمود قریشی پارے کہ ہڑتوم آ ملک آتا میڈیا، انفارمیشن، اسپورٹس، و دودوربیدگ نا بشخ آتے ٹی ہم تعلقداری تے مون آ دننگ اُن۔ اوپارے کہ وژن 2030بدلی نا درشانی ءِ۔ نن تہذیبی رابطہ غاتے مون آ دننگ خوانہ۔ پوسکن آ سرکڑدہ غاتا وژن 2030نا رداٹ سعودی عرب بدلی نا کنڈآ ہُننگ ءِ و دابشخ اٹی مستین اٹ کاریم متنے، داٹی نن تینا کڑد ءِ ادا کننگ کینہ۔ اوپارے کہ لکھ آ پاکستانی سعودی عرب اٹی رہینگ انگ ءُ ہراہموڑے پاکستانی فلم آتا نمائش ہُننگ، تینا پسندیدہ گلوکار آتا پرفارمنس آن چس ہلنگ ءِ پسند کیرہ، داہمو بشخ ء، ہراڑآنن مستین اٹ چکارکتون۔ اوپارے کہ نن مذہبی تعلقداری تون اوار اوار کلچرل تعلقداری نا مون آ دننگ نا خواہندار اُن، موسمیاتی بدلی نا بابت وزیرخارجہ پارے کہ گرین سعودی عرب و گرین مڈل ایسٹ و وزیراعظم عمران خان نا وژن کلین گرین پاکستان اسہ ایلو تون مطابقت تخرہ، چاگڑدی و موسمیاتی بشخ آتے ٹی کمکاری ءِ مون آ دننگ اُن، مخدوم شاہ محمود قریشی پارے کہ ای سعودی وزیر خارجہ ءِ مقبوضہ جموں و کشمیر نا حالیت آتیان معلومدار کریٹ و کشمیرنا ویل آ سعودی عرب نا مخ تفی آ اونا منت واری ءِ ہرفیٹ۔ نن اوغانستان نا بدل مروک آ حالیت آتیا گپ وتران کرین۔ ننا اوغانستان نا بابت سوچ اسٹ ءِ۔ شاہ محمود قریشی پارے کہ ویکسی نیشن و سفری مشکل آتا بابت گپ وتران مس۔ ہمو پاکستانی طالب علم آک ہرا سعودی عرب اٹی تعلیم نا خواہندار ءُ اوفتا آسراتی کن ای سعودی وزیرخارجہ تون ہیت کریٹ۔ شاہ محمود قریشی پارے کہ وزیراعظم عمران خان مدام پیشن نا ملک اٹی رہینگوک آ پاکستانی تا راجی آسراتی آ زور شاغک۔ شاہ محمود قریشی پارے کہ ای سی پیک ڈٹ خاص وڑاٹ خصوصی اقتصادی زون تیٹی سعودی کاروباری کمپنی تیکن زرکاری نا دوئی وارخواہی تیان سعودی وزیرخارجہ ءِ معلومدار کریٹ۔ سعودی وزیرخارجہ شہزادہ فیصل بن فرحان آل سعود پارے کہ پاک سعودی تعلقداری تے پین ودفنگ نا خواہندار اُن۔ ہڑتوم آ ملک آک مدام اسہ ایلو تون تفینو۔ اوپارے کہ ہڑتوم آ ملک آتا نیام اٹ خوشگوار برادرانہ تعلقداری ءِ۔ ہڑتوم آ ملک آتا نیام اٹ بڑزکو کہول آ ہن و بر ءِ پین مون آ دننگک۔ اوپارے کہ ہڑتوم آ ملک آتا نیام اٹ زرکاری و اقتصادی کمکاری نا بھلو وارخواہی اس ساڑی ءِ۔ سعودی وزیر خارجہ پارے کہ سعودی عرب اٹی لکھ آ پاکستانیک رہینگ انگ ءُ ہرا سعودی زرگزران اٹ اہم کڑد ادا کننگ ءُ۔ اوپارے کہ ڈیہہ نا سلامتی بھاز مقدم ءِ و سلامتی کن اواری اٹ کاریم ءِ برجاتخنہ۔
