پاکستان و سعودی عرب نا نیام اٹ جان جوڑی، تعلیم، ٹیکنالوجی و توانائی نا بشخ آتے ٹی کمکاری نا بھلووارخواہی اس ساڑی ءِ، وزیرخارجہ مخدوم شاہ محمود قریشی نا سعودی ہم منصب تون اوڑدہی ٹی گپ وتران

اسلام آباد۔ 27جولائی (اے پی پی) وزیرخارجہ مخدوم شاہ محمود قریشی تون اونا سعودی ہم منصب شہزادہ فیصل بن فرحان آل سعود سے شنبے نادے آ وزارت خارجہ ٹی اوڑدہی کرے۔ گپ وتران اٹی ہڑتوم آ کنڈآتا تعلقداری، چندی بشخ آتے ٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا باندات آ گپ وتران کننگا۔ شاہ محمود قریشی پارے کہ پاکستان و سعودی عرب نا نیام اٹ ہڑتوم آکنڈآتا برادرانہ تعلقداری ءِ۔ ہرافتا بنداو اسہ وڑمذہبی، دودوربیدگی و تاریخی قدر آتیاٹی ءِ۔ اوپارے کہ اہم ہیت دادے کہ ہڑتوم آ ملک آک مدام ہر سخت انگا وخت اٹی اسہ ایلوتون پبی تفینو۔ پاکستان، سعودی عرب نا وتواجہی و علاقائی سالمیت نا رکھ انا مخ تفی ءِ برجاتخنگ کن سنبرینگوک ءِ۔ ہڑتوم آ وزیرخارجہ غاک پاکستان و سعودی عرب نا نیام اٹ، سپریم رابطہ کونسل ءِ ہڑتوم آ کنڈآتا تعلقداری تا مون آ دننگ کن جوان ءُ گام اس گوندار۔ وزیرخارجہ پارے کہ پاکستان، مارچ 2022ء آ اسلام آباد اٹی اوآئی سی، وزرائے خارجہ کونسل نا بروک آ دیوان نا مہمانداری کن سنبرینگوک ءِ۔ وزیرخارجہ مخدوم شاہ محمود قریشی سعودی وزیرخارجہ ءِ پاکستان نا اقتصادی اولیتی ایجنڈانا خدوخال آن معلومدار کرے وپارے کہ پاکستان و سعودی عرب نا نیام اٹ جان جوڑی، تعلیم، ٹیکنالوجی و توانائی نا بشخ آتے ٹی ہڑتوم آ کنڈآتا کمکاری نا بھلو وارخواہی اس ساڑی ءِ، ہرافتیا اسیجائی کوشست آتے کاریم اٹ اتنگ نا گرج ءِ۔ وزیرخارجہ کشمیرناویل خاص وڑاٹ بھارت نا کنڈآن 5اگست نا اسہ کنڈی، غیرآئینی گام گیج آن پد، جہانی فورم تیا پاکستان نا موقف نا مخ تفی آ سعودی وزیرخارجہ نا منت واری ءِ ہرفے۔ ہڑتوم آ وزیرخارجہ غاک ہڑتوم آ کنڈآتا تعلقداری تا سوگوی و چندی بشخ آتے ٹی ہڑتوم آ کنڈآتا کمکاری ءِ مون آ دننگ کن رابطہ غاتا چرجوئی ءِ برجاتخنگ آ امناکریر۔ اوکان پد سعودی وزیرخارجہ شہزادہ بن فرحان آل سعود وزیرخارجہ مخدوم شاہ محمود قریشی تون اوار وزارت خارجہ نا سوزہ زار اٹی یات گاری نیال اس خلک۔