اسلام آباد۔ 27جولائی (اے پی پی) پاک اوغان اِرادے ئی میڈیا کنکلیو پگہ(چارشنبے نادے آن) بنجائی دارالحکومت اٹی بناکننگ ءِ۔ اِرادے ئی میڈیا کنکلیو نا بست وبند ءِ پاک اوغان یوتھ فورم و انسٹی ٹیوٹ آف ریجنل سٹڈیز بنجائی وزارت حوالکاری و شینکاری نا کمک اٹ کرینو۔ میڈیا کنکلیو ٹی پاکستان و اوغانستان نا میڈیا و ابلاغ عامہ نا بشخ آتا چاہندار آک ہڑتوم آ ملک آتا میڈیا نا نیام اٹ کمکاری، تین پہ تینی رابطہ غاتا مون آ دننگ، میڈیا نا کمک اٹ جامع اقتصادی راہداری نا قیام، چین پاکستان اقتصادی راہداری نا کمک اٹ ڈیہہ نا ورناتیکن ودی مروک آ وارخواہی، گوازی و دودوربیدگی سرجزآتا کمک اٹ کمکاری ٹی ودکی و اسیجائی اقتصادی فائدہ غاتے کن گام گیج و گمان تیا سجفرہ۔ اِرادے ئی میڈیا کنکلیو نا بنائی سیشن نا مہمان خاص بنجائی وزیر حوالکاری و شینکاری چوہدری فواد حسین مریک ہراداوخت آ اہم ءُ تران اس کیک۔ منتظمین آتا کنڈآن جاری کروک شیڈول نا رداٹ کنکلیو نا اولیکو دے پاکستان و اوغانستان نا میڈیا نا نیام اٹ کمکاری آ شرہ مریک، داشرہ ٹی پاکستان آن نسیم زہرہ، ہارون شاہ و سفیر منصور احمد خان وخت اس کہ اوغانستان آن جاوید ہاشم کاکڑ، شگفتہ صدیقی و رابطہ سادات بشخ ہلیرہ وخت اس کہ ماڈریٹر نا فرض ءِ نادیہ نقی سرایتک۔ اولیکو دے انا ارٹ میکو سیشن اٹی ہڑتوم آ ملک آتا بشخ ہلوک آک جامع اقتصادی راہداری نا جوڑ کننگ اٹ میڈیا نا کڑد آ گپ وتران کیرہ ہراٹی پاکستان آن حسن خان، قومی اسمبلی نا باسک شاندانہ گلزار و اوغانستان آن اسد کھوسہ، عرفان سینان و زہرہ صدیقی ئسک اوار ءُ۔ سینیٹ نا قائمہ کمیٹی حوالکاری نا چیئرمین سینیٹر فیصل جاوید گیسٹ آف آنر نا وڑاٹ کلیدی تران کیک۔ پاک اوغان اِرادے ئی میڈیا کنکلیو نا ارٹ میکو دے اولیکو سیشن اٹی تفریحی صنعت و اسپورٹس جرنلزم نا کمک اٹ رابطہ غاتا مون آ دننگ آ شرہ مریک ہراٹی پاکستان آن جاوید شیخ، طاہر خان و عثمان پیرزادہ وخت اس کہ اوغانستان آن فریدالدین عظیم و ابراہیم مہمند ئسک بشخ ہلیرہ۔ وزیر مملکت حوالکاری و شینکاری فرخ حبیب داوخت آ کلیدی تران اس کیک۔ ارٹ میکو سیشن اٹ شرہ نا سرحال امن نا راہداری۔۔۔۔سی پیک، شونداری و ورناآبادی مریک ہراٹی ہارون رشید، ماہرانہ سلاہ ایتک وخت اس کہ قومی اسمبلی نا باسک عندلیب عباس کلیدی تران کیک۔ اِرادے ئی میڈیا کنکلیو نا ایسری سیشن نا مہمان خاص ڈپٹی اسپیکر قومی اسمبلی قاسم خان سوری مریک، اوداوخت آ کلیدی تران اس ہم کیک۔
