اسلام آباد۔ 27جولائی (اے پی پی) بھارت اٹی اقلیت آتیا ظلم و بیدادی و اوفتے تون توہین آمیز سلوک بھارت نا جمہوری ملک اس مننگ آ سوج ہرفینے۔ کشمیر میڈیا سروس نا کنڈآن جاری اسہ رپورٹ اسے ٹی سویلی و نیامی ایشیاء نا امور نا بارواٹ قائم مقام نائب امریکی وزیرخارجہ ڈین تھامپسن نا دابیان نا حوالہ ءِ تننگانے ہراٹی او پاریسس کہ امریکی وزیر خارجہ اینٹونی بلنکن نا سے شنبے آن بھارت نا دورہ ٹی انسانی حق انا معاملہ اونا ایجنڈاٹی سرفہرست مریک۔ واشنگٹن اٹی اینٹونی بلنکن نا دورہ غان مست اسہ کانفرنس اسے آن تران کرسا تھامپسن میڈیا ءِ پارے کہ امریکی وزیرخارجہ تینا دورہ ٹی بھارتی سرکڑدہ غاتون انسانی حق و جمہوریت نا بابت سوج ہرفک۔ کے ایم ایس تینا رپورٹ اٹی پارینے کہ مسلمان تیان بیدس دلت، سکھ و عیسائی تے ہم مودی نا بھارت اٹی ہندوانتہاپسند آتا کنڈآن پدریسہ شست کننگ انگ ءِ۔ ساڑی آ سال تیٹی انسانی حق انا جہانی تنظیم تا کنڈآن جاری رپورٹ آتے ٹی بھارت اٹ اقلیت آتا ابترحالیت نا باندات ءِ چست کننگانے۔ امریکی محکمہ خارجہ مذہبی آجوئی نا بابت تینا ساڑی آ جہانی رپورٹ اٹ بھارت اٹی مذہبی اقلیت آتا حالیت آتا تاریک تصور اس پیش کرینے وخت اس کہ ہیومن رائٹس واچ بھارت اٹ مذہبی اقلیت آتا برخلاف جلہو ءِ توننگ اٹ مودی حکومت نا بے سہبی ءِ تالان کرینے۔ بھارت نا راجی امور نا ماہر دیپانارائن نا حوالہ ءِ ترسا رپورٹ اٹی پاننگانے کہ بھارت اٹی زالبول آتون توہین آمیز سلوک ڈغارآ غٹ آن بھلا انسانی حق انا لتاڑنگ ءِ۔ بھارتی فورس آک مقبوضہ جموں و کشمیر و چندی بھارتی ریاست آتے ٹی بدترین ظلم و بیدادی و عدالت آن ایڑتر خون اٹ اوار ءِ۔ رپورٹ اٹ مستی پارے کہ مذہبی اقلیت آتا برخلاف بھلو کچ اسے آ بیدادی و امتیازی سلوک بھارت نا سیکولر ملک مننگ نا دعویٰ تے بے نقاب کرینے۔ رپورٹ اٹ پاننگانے کہ بھارت اٹ مودی نا برسر اقتدار بننگ آن پد بھارت اٹ مذہبی اقلیت آتا حق انا لتاڑنگ آتے ٹی ترندی اٹ ودکی مسنے۔
