اسلام آباد۔ 26جولائی (اے پی پی) وزیراعظم عمران خان موسم برسات نا شجرکاری مہم نا بناءِ کرسا پارینے کہ غٹ پاکستانیک دامہم اٹی پبی بشخ ہلیر، ہرپاکستانی کم از کم اسہ درخت اس خلے، شار تیٹی اسہ جاگہ اس ہم خورک خننگپ، پاکستان چاگڑدی رکھ و گلوبل وارمنگ نا منفی اثرآتے کم کننگ کن گام گیج آتے ٹی لیڈ کننگ ءِ۔ او دوشنبے نادے آ ایف نائن پارک اٹی موسم برسات نا شجرکاری مہم نا بنائی دود آن تران کریکہ۔ داوخت آ بنجائی وزیر داخلہ شیخ رشید احمد، بنجائی وزیر ڈٹ بندی، شونداری و اصلاحات اسدعمر، وزیر مملکت موسمیاتی بدلی زرتاج گل، پی ٹی آئی نا راہشون سینیٹر فیصل جاوید، وزیراعظم نا خصوصی کمکارقومی جان جوڑی ڈاکٹر فیصل سلطان ئسک ہم ساڑی ئسر۔ وزیراعظم پارے کہ دنیا ٹی درخت آتا کچ انا لحاظ اٹ پاکستان چندی ملک آتیان پدی ءِ۔ بھارت ہم ننے آن درخت آتا کچ انا لحاظ اٹ مونی ءِ۔ مستین اٹ اسہ حکومت اس ہم داکنڈآ چکارکتو۔ دانا چاگڑد آ بھلو اثراس تمک۔ گلوبل وارمنگ جہانی کہول آ بھاز اہم ءُ ویل اس جوڑ مسنے۔ پاکستان ءِ سرسوز و شاداب کننگ، کچٹی ءِ کم کننگ و چاگڑد ءِ گچین کننگ کن لاہور، پشاور و کراچی تون اوار مچ آ ملک اٹی شجرکاری بھاز المی ءِ۔ جنگل آتا رقبہ ءِ ودفنگ نا گرج ءِ۔ وزیراعظم پارے کہ اینو موسم برسات نا شجرکاری مہم نا بناءِ کننگ انگ ءِ۔ غٹ پاکستانیک داٹی بشخ ہلیر و ہر پاکستانی اگہ کم از کم اسہ درخت اس ہم خلے تو بھاز بھلو انقلاب اس بننگ کیک۔ وزیراعظم ضلعی انتظامیہ نا آفیسر آتے پارت کرے کہ اُرا، پارک آتون اوار غٹ خورک انگا جاگہ غاتیا درخت خلیر۔ شارتیٹی اسہ جاگہ اس ہم درخت آتیان خورک سلپ۔ وزیراعظم پارے کہ ننا فرض ءِ کہ بروک آ چین تیکن جوان ءُ ملک اس ہلن کان۔ ننے میرات اٹی ہرا ملک ملا او چاگڑد نا لحاظ اٹ جوان ئس۔ انگریز آک ہم داڑے شجرکاری کریسر۔ اوپارے کہ پی ٹی آئی نا حکومت 10ارب درخت خلنگ نا ہدف ءِ مقرر کرینے ہرانا دنیا ستاءِ کننگ ءِ۔ پاکستان گلوبل وارمنگ نا منفی اثرآتے کم کننگ نا لحاظ اٹ دنیا نا کماشی ءِ کننگ ءِ۔
