گوادر۔5جولائی (اے پی پی): مزن وزیر عمران خان ءَ گوشت کہ گوادر پڑ ءَ اقتصادی ءُ دیمروئی چست ءُ ایر آنی بنجاہ جوڑ بیت ایشی ءَ ناں ایوک ءَ پاکستان ءُ بلوچستان ءَ را سیت رسیت بلکینگ ءَ نیامی ایشیا ءَ ھوار دمگی ملک آنی واستہ ھم دراج بُریں تجارتی موہ پیداک بنت، گیر ملکی سرمایہ کارآناں ون ونڈو آپریشن ءِ چیر دستی ءَ آسراتی پجاری کنگ بیت، مئے کوشت انت کہ دیمروئی ءِ کار ءَ ملک ءِ توامیں دمگ آناں یکجائی ءَ بہ زور آں دیم ءَ بہ جنز آں، ملک ءَ را معاشی رنگ ءَ وت مستر جوڑ کنگ ءِ واستہ برآمدات آنی تہ ءَ گیشی دیگ لوٹ ایت، گوادر ءَ ھوار توامیں شہر آنی ماسٹر پلان جوڑ کنگ بوھگ ءَ انت، دیمروئی منصوبگ آنی نگرانی ءَ را لائیو مزن وزیر کارگس ءَ گوں کنگ بیت، اے رد ءَ مزن وزیر کارگس ءُ سر وزیر سیکرٹریٹ ءِ نیام ءَ جوانیں رابطہ آناں ھم دل یکیمی جوڑ کنگ بیت، بنجاھی حکومت ءَ بلوچستان ءِ دیمروئی ءِ واستہ 730 ارب کلدار ءِ تاریخی پیکیج داتگ، پاکستان ءِ سرجمیں کوشست انت کہ اوگانستان ءَ مھکمیں ایمنی بہ بیت، اوگانستان ءِ جیڈھ ءِ سیاسی گیواری در بہ کپ ایت، جنگ ءُ چوپ ءُ کشاں چیل مہ بیت، اے ھیالانی درشنی آءی ءَ دو شمبے ءَ گوادر ءِ تر ءُ تاب ءِ ساھت ءَ دیمروئی منصوبگ آنی بنگیج ءُ وت مہ وتی تپاک نامہ آنی سر ءَ دست چنگل ءِ مراگش ءَ گوں گشتانک دیان ءَ کت۔ مزن وزیر ءَ گوادر فری زون ءِ بنگیج ءُ ایشی ءِ فیز ٹو ءِ بن ھشت ھم ایر کت۔ مراگش ءَ چیئرمین سینیٹ سینیٹر صادق سنجرانی، سر وزیر بلوچستان جام کمال، بنجاھی وزیر اھوالکاری ءُ شنگ کاری فواد حسین چوہدری، بنجاھی وزیر اسد عمر، علی زیدی، شاہ محمود قریشی، زبیدہ جلال ءَ ابید مشیر راجی سلامتی معید یوسف، چیئرمین سی پیک اتھارٹی لیفٹیننٹ جنرل (ر) عاصم سلیم باجوہ ءُ ایندگر ھم ساڑی اتنت۔ مزن وزیر ءَ گوشت کہ گوادر ءِ تر ءُ تاب ءِ دو مول ءُ مراد بوتگ انت، یکے وا گودر فری زون ءِ بنگیج ءُ 2200 ایکڑ ءِ سر ءَ فری زون ٹو ءِ بن ھشت ءِ ایر کنگ بوتگ۔ آئی ءَ گوشت کہ بلوچستان ءَ را گوستگیں وھد ءُ باریگ ءَ ڈلگچار کنگ بوتگ، بد بھتی ءَ دیمروئی ءِ پڑ ءَ بازیں دمگ ءِ پشت ءَ پشت کتگ ءُ آوانی تہ ءَ یک ءِ بلوچستان انت۔ مزنو زیر ءَ گوشت کہ 1960 ءِ زمانگ ءَ پاکستان ھما ملک آنی لڑ ءَ ھوار ات ھما کہ گوں ترندی ءَ دیمروئی کنگ ءَ بوتگ انت ءُ ما یک رول ماڈلے بوتگ آں۔ مرچی آ ایشیئن ٹائیگر گوشگ بنت۔ آواں مئے نیمگ ءَ چاریتگ بلے ما بازیں ردئی کتگ ایشانی سبب ءَ ما اے جاوراں گوں دیم پہ دیم آں۔ آئی ءَ گوشت کہ گوادر پاکستان ءِ فوکل پوائنٹ جوڑ بیت ایشی ءَ چہ پاکستان ءُ ھاسیں رنگ ءَ بلوچستان ءَ را سیت رسیت، توان ءُ آپ ءِ وڑیں جیڈھ آناں گیوار کنگ نہ بوتگ، صنعتی چست ءُ ایر آنی واستہ گیس ھم ضلوری بنت، ایشی ءَ ابید گوادر ءَ را ایندگر دمگ آں گوں ملارینگ ءِ واستہ سڑک آنی جوڑشت ءَ دلگوشی دیگ بوھگ ءَ انت۔ ھاسیں رنگ ءَ سی پیک ءِ روبرکتی روٹ ءِ سر ءَ ھم دھیان دیگ نہ بوتگ بلے نوں توامیں منصوبگ آنی سر ءَ کار بوھگ ءَ انت۔ آئیءَ گوشت کہ ھاٹیگ ءُ آپ ءِ منصوبگ ءُ انٹرنیشنل گوادر ائیر پورٹ ءِ جوڑیشت بوھگ ءَ انت۔ ایش گوادر ءَ را دگنیا ءِ گوما ملارین ایت، اے منصوبگ آنی سر ءَ کار گوں ترندی ءَ بہ بیت بلے ایشانی گام سُست بوھگ ءَ انت۔ مزن وزیر ءَ گوشت کہ چینی ءُ ایندگر گیر ملکی سرمایہ کار آناں ادا جوانیں آسراتی پجاری ءَ دل یکیمی جوڑ کنگ بیت اگاں ما جوانیں آسراتی نہ دات انچیں ملک است کہ آواں جوانیں آسراتی رسگ ءَ انت ، اے رد ءَ ویتنام ، کمبوڈیا ءُ بنگلہ دیش ءَ سرمایہ کار آناں باز آسراتی رسگ ءَ انت، استیں حکومت ءَ گیر ملکی سرمایہ کار آنی واستہ ون ونڈ آپریشن بندات کنگ ءِ پیسلہ کتگ۔ مزن وزیر ءَ گوشت کہ مئے درستاں چہ مستریں جیڈھ ایش انت کہ مئے برآمدات آنی گوستگیں وھد ءَ گیشی نہ بوتگ ءُ برآمدات آناں گیش ودینگ ءِ رد ءَ دلگوشی دیگ نہ بوتگ۔ مزن وزیر ءَ گوشت کہ اچ ملک تاں وھد ءَ دیم ءَ جنزت نہ کنت ھما وھد ءَ تاں آ توامیں دمگ ءَ را ھمکچیں دیمروئی ءَ دل یکیمی جوڑ مکنت ۔ مزن وزیر ءَ گوشت کہ بنجاھی حکومت ءَ بلوچستان ءِ واستہ آیوکیں چار سال آنی واستہ 730 ارب کلدار ءِ ٹوھیں پیکج داتگ ءُ اینکیاس ٹوھیں دیمروئی پیکج اچبر پیسر ءَ صوبگ ءَ دیگ نہ بوتگ۔ بلوچستان یک ٹوھیں دمگ ات تاں وھد ءِ ادا سڑک جوڑ نہ بیت ادا دیمروئی بوت نہ کنت، دیمروئی پیکج ءِ وسیلگ ءَ درو ءُ گستائیں دمگ آنی مردم آناں نزیک کنگ بوھگ ءَ انت، سی پیک ءِ روبرکتی کشک ءِ دیمروئی دیم ءَ جنزیتگ، مزن وزیر ءَ گوشت کہ احساس پروگرام ءِ چیر دستی ءَ مئے سرجمیں کوشست انت کہ کالجز جوڑ بکن آں، گوادر ءَ یونیورسٹی جوڑ بوھگ ءَ انت، کامیات پاکستان پروگرام ءِ چیر دستی ءَ گریبیں مردم آناں آسان ءُ آسودگی ءَ وام دیگ بیت، دھکان آناں آسراتی دیگ بیت ءُ علاج ءِ واستہ انشورنس پجاری کنگ بیت۔ آئی ءَ گوشت کہ پاکستان ہاوسنگ منصوبگ سستی ءِ آماچ انت چیا کہ گوستگیں زمانگ ءَ بینک آنی گریبیں الس ءِ مردم آناں وام دیگ ءِ اچ روایت نہ بوتگ، نوں اے وام پجاری کنگ بوھگ ءَ انت۔ مزن وزیر ءَ گوشت کہ کامیات ورنا پروگرام ءِ چیر دستی ءَ وزارت ءِ زرئی کار ءَ ماہی کش آنی لانچ ءُ ماھیگ گرگ ءِ جال آناں گہتر جوڑ کنگ ءِ واستہ پروگرام جوڑ کتگ، گوادر نیامی ایشیا ءَ پڑ ءَ را وت مہ وت ملارین ایت، تاجکستان ءُ ازبکستان ءِ گوام مئے منوگری بوتگ۔ آ گوادر ءِ کشک ءَ تجارت کنگ لوٹاں۔ مزن وزیر ءَ گوشت کہ اوگانستان ءِ ھوالگ ءَ درستانی واھشت انت کہ اوگانستان ءَ ایمنی برجا بہ بیت، ایران ءِ صدر ءَ گوں ھال تران بوتگ ءُ مئے حکومت ءِ اے کوشست انت کہ اوگانستان ءِ درستیں ھمساگیں یکجائی ءَ کوشست بکن انت کہ آھوادے یک سیاسی گیوری ءِ در بہ کپ ایت ءُ کشت ءُ ھون ءُ لُٹ ءُ پُل مہ بیت چیا کہ جنگ ءُ چوپ ءِ درستاں چہ گیشتریں تاوان وا اوگانستان ءَ را رس ایت بلے ھمساھگیں ملک آناں ھم ایشی ءِ تاوان رسیت، پناہ گاہ آنی گوما نیامی ایشیا ءِ گوما تجارتی رابطہ ھم آماچ بنت، وزیر ءِ درئی کار کوشست کنگ ءَ انت کہ توامیں ھمساھگیں ملک ءُ طالبان آنی گوما گپ ءُ تران بکن آں ءُ وڑے نہ وڑے ءَ آھوادے جیڈھ آنی سیاسی گیواری ءِ در بہ کپ ایت۔ مزن وزیر ءَ گوشت کہ وزارت ءِ منصوبگ بندی ءَ بلوچستان ءِ سر وزیر ءِ گوما یکجائی ءَ صوبگ ءِ واستہ باز جوانیں پیکیج ءِ تیار کتگ، مزن وزیر کارگس گوادر ءِ منصوبگ آنی سرجمیں رنگ ءَ نگرانی ءَ کنت انت ءُ سر وزیر سیکرٹریٹ ءَ گوں ھم مئے رابطہ بیت تانکہ کجام ھم رنگیں پینگ دیم ءَ مہ کپ ایت، توامیں منصوبگ آنی سر ءَ ھمک ماہ چار ءُ تپاسی گرگ بیت، ایسٹ بے ایکسپریس وے ءِ بنگیجی مراگش ءَ ھم ھوار باں۔ آئی ء۔گ وشت کہ توامیں شہر آنی واستہ ماسٹر پلان جوڑ بوھگ ءَ انت چیا کہ ماسٹر پلان نہ بوھگ ءِ سبب ءَ شہر پراھ ءُ شاھیگان بوھگ ءَ انت ایشی ءِ سبب ءَ آسراتی پجاری ءَ جیڈھ ودی بوھگ ءَ انت۔ مراگش ءَ گوں سر وزیر بلوچستان جام کمال، پاکستان ءَ چین ءِ سفیر نونگ رونگ ءُ چیئرمین سی پیک اتھارٹی لیفٹیننٹ جنرل (ر) عاصم سلیم باجوہ ءَ ھم گشتانک دات۔
