اسلام آباد۔ 26جولائی (اے پی پی) اسپیکر قومی اسمبلی اسد قیصر نا کماشی ٹی پاکستان نا 14باسکی پارلیمانی ڈل پاکستان و ترکی نا اسپیکر نا اولیکو سہ فریقی دیوان اٹی بشخ ہلنگ کن باکو، آذربائیجان آ روانہ مسنو۔ دوشنبے نادے آ قومی اسمبلی سیکرٹریٹ نا رداٹ پارلیمانی ڈل انا دا دورہ آذربائیجان نا ملی مجلس نا اسپیکر صاحبہ غفورواکی سہ فریقی دیوان اٹی بشخ ہلنگ کن خاص سلہ غا کننگ انگ ءِ ہرا26جولائی آن 31جولائی 2021اسکان باکوٹی اڈ ہلیک۔ داسہ فریقی پلیٹ فارم نا ٹہیفنگ آذربائیجان نا ملی مجلس نا اسپیکر صاحبہ غفورواکی نا سلاہ ئس ہرانا پاکستان و ترکی نا اسپیکرآک ہرمسٹ آ ایلم ملک آتے ٹی خڑکی و برادرانہ تعلقداری تے پین مون آ دننگ کن تائید کریر۔ داسہ فریقی دیوان اٹی علاقائی کمک و رابطہ غاتے ودفنگ آ سجفنگ کن سے شنبے نادے 27جولائی 2021ء آ مسہ پارلیمان تا اسپیکر آتا ایگزیکٹوکمیٹی نا دیوان مریک۔ ایگزیکٹیو کمیٹی نا دیوان تیٹی باکو اعلامیہ نا مندرجات و ارٹ میکو سہ فریقی دیوان نا ہند انا تعین آہم ہیت وگپ کننگک۔ پاکستان نا پارلیمانی ڈل اولیکو سہ فریقی دیوان اٹی بشخ ہلنگ آن بیدس آذربائیجان نا سیاسی سرکڑدہ غاتون اوڑدہی کیک۔ ہڑتوم آ ملک آتے ٹی پارلیمانی کمکاری نا بابت مفاہمتی یات داشت آتیا ہم دستخط کننگک۔ دادورہ ہڑتوم آ ایلم ملک آتا پارلیمان تا نیام اٹ تعلقداری تے مون آ دننگ و علاقائی رابطہ غاتے ٹی ودکی کن اہم ءُ مزل نا نشان اس مریک۔ اسپیکر قومی اسمبلی ہڑتوم آ ملک آتا پارلیمان تیٹی رابطہ غاتے ٹی ودکی نا تینا عزم انادرشانی ءِ کیک و مقبوضہ جموں و کشمیر اٹی برجابھارتی جارحیت ءِ ہم تالان کیک۔ پاکستانی پارلیمانی ڈل قومی اسمبلی نا باسک صاحبزادہ صبغت اللہ، صالح محمد، سیف الرحمان، شوکت علی، منزہ حسن، مرتضیٰ جاوید عباسی، فضل محمد خان، راجہ خرم شہزاد نواز، ڈاکٹر عائشہ غوث پاشا، سید مصطفی محمود، سید حسین طارق، اسامہ قادری و نازبلوچ آ تالان ءِ۔
