اسلام آباد۔ 26جولائی (اے پی پی) وزیراعظم نا خصوصی کمکار امور سی ڈی اے علی نواز اعوان آزاد کشمیر نا گچین کاری تیٹی شاندار سرسہبی آ وزیراعظم عمران خان و پاکستان تحریک انصاف آزاد کشمیر نا کارندہ غاتے مبارکبادی ترسا پارینے کہ آرایس ایس نا نظریہ باتس کشمیر نا سفیر کٹا، آزاد کشمیر نا الس وزیراعظم عمران خان نا کماشی آ ہراپت انا درشانی ءِ کرے او ستاکڑزک، عمران خان کشمیری الس ءِ مایوس کپک و کشمیرنا حقی سفیر جوڑ مریک۔ دوشنبے نادے آ آزاد کشمیر نا گچین کاری تیٹی پی ٹی آئی نا شاندار سرسہبی آن پد گپ وتران کرسا خصوصی کمکار علی نواز اعوان پارے کہ کشمیری الس اسٹیٹس نا جمود ءِ پرغانے و میراتی سیاست نا علمبردار آتے شکست فاش تسنے۔ اوپارے کہ ووٹرآک مریم نواز و بلاول بھٹو ءِ مسترد کرسا پک کریر کہ کشمیری الس دروغ انا قول و خورک نعرہ غاتے اٹ ریفنگ مفک۔ اوپارے کہ آرایس ایس نا نظریہ باتس ملک دشمن آتون مراسم تخنگ و دشمن ءِ توارکروک آک مسترد مسر و کشمیر نا حقی سفیر کٹا، کشمیری الس سہی و غلط ءِ پہہ مس۔ مریم نواز نا کنڈآن گچین کاری تیٹی دھاندلی نا دوبہ غاتیا گپ وتران کرسا علی نواز اعوان پارے کہ (ن) لیگ ہبکہ ئی نا گواچی ءِ بھلا بھلا دعویٰ تا جاگہ غا او اگہ کشمیر اٹی کاریم کروسر تو اینو دادے ءِ خنتویرہ۔وزیراعظم نا خصوصی کمکار پارے کہ وزیراعظم عمران خان انشاء اللہ کشمیر کن گچین ءُ ٹیم اس جوڑ کیک۔
