راولپنڈی۔ 26جولائی (اے پی پی) پاک فوج اوغان نیشنل آرمی نا درخواست آ اوغانستان نا 5آفیسر آتون اوار 46فوجی کارندہ غاتے پاکستان اٹی پناہ/رکھ ءُ کسر اس فراوان کرینے۔ داکارندہ غاک اوغانستان اٹی سیکورٹی نا بدل مروک آ حالیت آتا سوب آن پاک۔اوغان جہانی سیم اتون تینا فوجی پوسٹ آتے ہلنگ آ بیوس مسر۔ پاک فوج انا شعبہ تعلقات عامہ نا رداٹ دااوغان فوجیک تدوک آ نن چترال نا ارندو سیکٹر آ سرمسوسر۔ اوغان نیشنل آرمی نا ہندی کمانڈر اردو سیکٹر چترال اٹ پاک فوج آن اوغان سیکورٹی کارندہ غاتے کن پناہ و رکھ ءُ کسر اس فراوان کننگ نا درخواست کرے۔ پاک فوج انا کنڈآن معلومداری و ایلو المی آ گام گیج آتے کن اوغان کمامدارآتون رابطہ کننگا اوکان پد المی فوجی وڑوڈول انا رداٹ اوغان نیشنل آرمی و بارڈر پولیس نا 5آفیسر آتون اوار 46کارندہ غاتے پاکستان اٹی پناہ/رکھءُ کسر اس فراوان کننگانے۔ اوغان فوجی تے طے مروک فوجی اصول آتا رداٹ کن وخور، ہنکین و المی طبی امداد فراوان کننگانے۔ داآفیسر وورناتے ضابطہ نا کارروائی آن پد شرف اٹ اوغان حکومت نا حوالہ کننگک۔ داکان مست یکم جولائی آ ہم 35اوغان فوجیک جہانی سیم اتون تینا فوجی چوکی تے ہلنگ آن پد پاک فوج ءِ پناہ/رکھ ءُ کسر اس فراوان کننگ نا درخواست کریسر۔ اوفتے ہم پاکستان اٹی رکھ ءِ کسر اس تننگا و مناسب وڑوڈول آن پد اوغان حکومت نا حوالہ کننگا۔
