اسلام آباد۔ 26جولائی (اے پی پی) وزیر مملکت حوالکاری و شینکاری فرخ حبیب پارینے کہ وزیراعظم عمران خان دلیر سفیر و سچاءُ وکیل اسے نا وڑاٹ ہر جہانی فورم آ کشمیر نا مقدمہ تون مون ترساکیک، ہرافک کشمیر نا سودا ءِ کریر اوفتے اینو کشمیریک وونٹ آن ”ریجیکٹیڈ“ کرینو، آزاد کشمیر و ملک انا چندی بشخ آتے ٹی رہینگوک آ پاکستانی تا منت وار، ہرافک وزیراعظم عمران خان آ پت انا درشانی ءِ کریر، کشمیریک پی ٹی آئی ءِ ہرا مینڈیٹ ءِ تسر اونا شرف اٹ شونداری و شونہالی نا جال اس تالان کینہ۔ دوشنبے نادے آ آزاد کشمیر گچین کاری نا بارواٹ بیان اٹی وزیر مملکت فرخ حبیب پارے کہ کشمیر نا الس درو، دھاندلی، دوبہ و تنقید نا سیاست ءِ جہہ جاگہ کرینو، مریم و بلاول گلگت بلتستان آن پد آزاد کشمیر اٹی عبرت ناک شکست آن پد داسہ امر محسوس کننگ ءُ؟ اوپارے کہ 25جولائی، تاریخ نا بشخ جوڑ مسنے، دادے آ کشمیریک مودی نا یار، جعلی اکاؤنٹس، منی لانڈرنگ و سرٹیفائیڈ دروغ تڑآتے سبخ اس تسر۔ ملک اٹ لس گچین کاری تیان پد گلگت بلتستان و آزاد کشمیر نا الس ہڑتوم آ کرپٹ جماعت آتے الوداع پارینو۔ اوپارے کہ ہرافک تینا برام تیا مودی ءِ بٹنگر، امب و ساڑی تا ٹیکی ہلیر، حریت راہشون تے گوجالر، کشمیریک اوفتے اسل بشخنگ کپسہ۔
