اسلام آباد۔ 26جولائی (اے پی پی) سعودی عرب نا وزیر خارجہ پرنس فیصل بن فرحان آل سعود، تینا پاکستانی ہم منصب شاہ محمود قریشی نا سلہ غا پگہ سے شنبے نادے 27جولائی آ پاکستان نا دورہ ءِ کیک۔ سعودی حکومت نا سینئر کمامدارآتیا تالان ڈل ہم اوڑتون اوار مریک۔ دادورہ ٹی، ہڑتوم آ وزیر خارجہ غاک ہڑتوم آ کنڈآتا تعلقداری نا غٹ پلو آتون اوار علاقائی و جہانی باندات آ گپ وتران کیرہ۔ سعودی وزیر خارجہ دادورہ ٹی ایلو بڑزکو کمامدارآتون ہم اوڑدہی کیک۔ وزیرخارجہ غاک ہڑتوم آ ملک آتا سرکڑدہ غاتا وژن نا رداٹ ہڑتوم آ کنڈآتا کمکاری ٹی پیش رفت نا ہم جاچ ءِ ہلیرہ۔ پاکستان و سعودی عرب نا نیام اٹ دیرینہ و تاریخی برادرانہ تعلقداری ءِ، ہراناروتہ غاک اسیجاعقیدہ، تاریخ و تین پہ تینی مخ تفی نا سوگو بنداوتیا ٹی ءُ۔ سعودی وزیرخارجہ نا دادورہ ہڑتوم آ ملک آتا نیام اٹ بڑزکو کہول انا ہن و بر، چندی بشخ آتے ٹی ہڑتوم آ کنڈآتا کمکاری ءِ پین مون آ دننگ اٹ کمکار مریک۔
