کوئٹہ۔ 23جولائی (اے پی پی) وزیراعلیٰ بلوچستان جام کمال خان بلوچستان نا الس ءِ بھلا عئید انامبارکبادی ترساپارینے کہ اینو نادے نئے بیرہ ننے سنت ابراہیمی آ عمل کرسا قربانی نا سبخ ایتک بلکن صبر و تحمل و ایثارنا تعلیم ہم ایتک، ہرانا ساڑی آ وخت اٹی بے کچ گرج ءِ، اگہ نن ملک ءِ مون تروک چیلنج آتون سرسہبی اٹ مون تننگ خوانہ تو ننے سنت ابراہیم ءِ کسر نا ڈیواکرسا اسلامی رغاموک آتا رداٹ تینا زند ءِ تیر کننگ و تینے ٹی سگ و قربانی نا جوزہ ءِ ودی کروئی مریک، ہنداوڑ نن شدت و انتہاپسندی نا سوچ ءِ ہم شکست تننگ کینہ۔ داخیال آتا درشانی ءِ او عئید انا نماز ءِ خواننگ آن پد مخلوق تون گپ وتران کرساکرے۔ اوپارے کہ اینو نادے ننے آن داخواست ہم کیک کہ السی نمائندہ و صاحب ثروت بندغ آک تینا است خواہی و تینا بے گرج خڑچ آتے کچ اٹ کرسا ودکی وسیلہ غاتے حقدار بندغ آتا راجی آسراتی کن کاریم اٹ اتیر و تینا خوشی تیٹی راج انا نیزگار تپہ و نادار آتے ہم اوار کیرو ہرافک عئید انا خوشی تے منائفنگ نا وس تخپسہ اوفتا کمک ءِ کیر، قربانی نا جوزہ غان سرشار قوم و راج آتے اسل زوال بننگ کپک۔
