اسلام آباد۔ 23جولائی (اے پی پی) آزاد جموں و کشمیر الیکشن کمیشن کانود ساز اسمبلی نا گچین کاری تیکن غٹ بست وبند آتے پورو کرینے، الیکشن کمیشن گچین کاری تے آجو، ساف و شفاف بنداوتیا کرفنگ کن سنبرینگوک ءِ، گچین کاری تیکن پولنگ یک شنبے نادے آ مریک۔ آزاد جموں و کشمیر الیکشن کمیشن نا باسک فرحت علی میر جمعہ نادے آ داڑے پریس کانفرنس آن تران کرساپارے کہ آزاد کشمیر اٹی اسمبلی حلقہ غاتا کچ 33ءِ وخت اس کہ پاکستان نا ہرچار آ صوبہ غاتے ٹی کشمیری باہوٹ آتا 12نشست ءُ ہرافتا گچین کاری کن غٹ بست وبند آک پورو ءُ، 8خاص نشست آتا گچین کاری کانو دساز اسمبلی نا گچین کاری نتیجہ غاتا بننگ آن پد کننگک۔ آزاد جموں و کشمیر اٹی گچین کاری تا وخت آ امن وایمنی ءِ برقرار تخنگ کن سیکورٹی نا پبی بست وبند کننگانے۔ فرحت علی میر پارے کہ رائے دہندگان آتا جم کچ 32لکھ 20ہزار آن زیات ءِ، پولنگ اسٹیشن تے اے، بی و سی کیٹگری ٹی بشخنگانے۔ اے کیٹگری ٹی بے کچ حساس 829پولنگ اسٹیشن ءُ وخت اس کہ بی کیٹیگری نا حساس پولنگ اسٹیشن تا کچ 1200آن زیات ءِ۔ اوپارے کہ نارمل پولنگ اسٹیشن تا مقابلہ ٹی حساس پولنگ اسٹیشن تیٹی سیکورٹی کارندہ غاتا کچ زیات مننگ کیک۔ فرحت علی میر پارے کہ آزاد جموں و کشمیر الیکشن کمیشن آزاد کشمیر نا غٹ سیاسی جماعت آتا خواست آ لااینڈ آرڈر ءِ برقرار تخنگ کن پاک فوج انا کارندہ غاتے تعینات کننگ نا خواست کریسس ہرانا رداٹ پاک فوج و ایلو سول آرمڈ فورس آتے الیکشن نا وخت آ پولنگ اسٹیشن تا پیشن تعینات کننگک۔ پولنگ نا عمل اٹ آرمی نا ہچ ءُ تعلق اس مفک، پولنگ اسٹیشن تا تہہ ٹی ریٹرننگ آفیسر و پریزائیڈنگ آفیسر آک تینا فرض ءِ سرایترہ وخت اس کہ کوئیک رسپانس فورس ءِ گرج انا دروشم اٹ طلب کننگ مریک۔ اوپارے کہ آزاد جموں و کشمیر الیکشن کمیشن کانود ساز اسمبلی نا گچین کاری تے آجو، ساف و شفاف بنداوتیا کرفنگ کن سنبرینگوک ءِ۔ اوپارے کہ آزاد جموں و کشمیر اٹی الیکشن عدلیہ کرفنگ ءِ۔
