اسلام آباد۔23جولائی (اے پی پی) وزیرخارجہ مخدوم شاہ محمود قریشی پارینے کہ دورہ چین آن ننا ہڑتوم آ کنڈآتا برادرانہ تعلقداری پین سوگو مریک۔ جمعہ نادے آ چین آ روانگی آن مست تینا اسہ ویڈیو کلہو اسے ٹی وزیرخارجہ پارے کہ ای اینو(جمعہ)نادے آ چین انا اِرادے ئی دورہ غا روانہ مننگ اٹی اُٹ، کنا چین نا وزیر خارجہ اسٹیٹ قونصلر وانگ ژی تون اوڑدہی مریک۔ اوپارے کہ سیکرٹری خارجہ و ایلو سینئر آفیسر آک کنتون اوار ءُ، نن بڑزکو چینی کمامدارآتون اوڑدہی تیٹی پاکستان و چین نا نیام اٹ تعلقداری تا اول سرآن جاچ ءِ ہلینہ۔ شاہ محمود قریشی پارے کہ اوڑدہی ٹی ہڑتوم آ کنڈآتا اسٹریٹجک ایجنڈا غا شرہ مریک۔ وزیرخارجہ پارے کہ ننے اوغانستان و علاقائی حالیت آتیا اسہ ایلو نا تاثرآتے ہُننگ نا موقع ملک۔ اونا پاننگ ئس کہ سی پیک پروجیکٹ آتیا داتم اسکان مروک آ پیش رفت و آخبت نا لائحہ عمل آ ننا سرجم ءُ نشست اس مریک۔ انشاء اللہ دادورہ غان ننا ہڑتوم آ کنڈآتا تعلقداری پین سوگو مریک۔ شاہ محمود قریشی پارے کہ پاک چین سنگتی، ہرا تینا ہفت می دہائی ٹی پترینگانے او انشاء اللہ بروک آ وخت آتے ٹی تینا رنگ ءِ نشان ایتک۔
