اسلام آباد۔ 19جولائی(اے پی پی) وزیرخارجہ مخدوم شاہ محمود قریشی دوشنبے نادے آ اوغان ہم منصب محمدحنیف آتمر تون ٹیل فون آ رابطہ کرے۔ ہڑتوم آ وزیرخارجہ غاتا نیام اٹ ہڑتوم آ کنڈآتا باندات آتیا گپ وتران مس۔ دفترخارجہ نا رداٹ وزیرخارجہ مخدوم شاہ محمود قریشی تینا اوغان ہم منصب ءِ 16جولائی 2021ء آ مروک آ واقعہ غا کانود نافذ کروک آ ادارہ غاتا کنڈآن داتم اسکان کروک آ گام گیج آتیان معلومدار کرے۔ وزیرخارجہ اوغان وزیر خارجہ ءِ باور کرفے کہ حکومت پاکستان دوبہ دار آتا زوت دزگیری و اوفتے اوفتا کروک نا سزا ترفنگ کن ہرممکن گام گیج کیک وخت ا س کہ وزارت خارجہ مروجہ سفارتی روایت آتیان جوانی اٹ معلومدار ءِ۔ شاہ محمود قریشی پارے کہ پاکستان اٹ جوڑ، اوغان سفارتخانہ و قونصلیٹ نا سیکورٹی ٹی پین ودکی کننگانے، ننے اومیت ءِ کہ اوغان حکومت، پاکستان نا کنڈآن کروک آ سنجیدہ کوشست آتے مون آ تخسا اوغان سفیر و سینئر سفارتکار آتے پاکستان آن پدی بٹنگ انگ نا فیصلہ غا نظرثانی کیک۔ اوغان وزیر خارجہ محمد حنیف آتمر داواقعہ نا جاست وپاست اٹ جند انا است خواہی ہلنگ آ وزیراعظم عمران خان نا منت واری ءِ ہرفے و اوغان سفارت خانہ و قونصلیٹ نا سیکورٹی ءِ ودفنگ نا بابت وزیرخارجہ مخدوم شاہ محمود قریشی نا کوشست آتا ستاءِ کرے۔ اوغان وزیرخارجہ پارے کہ اوغانستان، پاکستان تون ہڑتوم آکنڈآتا تعلقداری تے خاص اہمیت ایتک و اوفتا سوگوی کن سنبرینگوک ءِ۔ ہڑتوم آ وزیرخارجہ غاک ہڑتوم آ کنڈآتا است خواہی نا باندات آ رابطہ ءِ برجاتخنگ آ امناکریر۔
