اسلام آباد۔ 19جولائی (اے پی پی) چیئرمین سینیٹ محمد صادق سنجرانی پارینے کہ پاکستان، بلغاریہ تون تعلقداری تے بھاز قدر انا نظراٹ ہرک، ہڑتوم آ ملک آتا نیام اٹ زرگزرانی، واپار، تیل، گیس و معدنیات اٹی کمکاری کن وارخواہی ساڑی ءِ، بلغاریہ نا زرکارآک پاکستان نا زرکاردوست پالیسی تیان بایدے فائدہ ہرفر۔ داخیال آتا درشانی ءِ او پاکستان اٹی بلغاریہ ناسفیر ایرینا گنیجیواتون پارلیمنٹ ہاؤس اٹی اوڑدہی ٹی کرے۔ اوڑدہی ٹی تین پہ تینی است خواہی نا باندات آتون اوار ہڑتوم آ کنڈآتا تعلقداری و علاقائی حالیت آتیا گپ وتران کننگا، اوڑدہی ٹی علاقائی و جہانی ویل آتیاہم گپ وتران کننگا۔ اوڑدہی ٹی ہڑتوم آ کنڈآتا واپار، اقتصادی کمکاری ءِ ودفنگ و پارلیمانی رابطہ غاتے ٹی پین ترندی اتنگ آ گپ وتران کننگا۔ چیئرمین سینیٹ محمد صادق سنجرانی پارے کہ پاکستان و بلغاریہ نا نیام اٹ دوستانہ تعلقداری ءِ، پاکستان بلغاریہ تون تعلقداری تے بھاز قدر انا نظراٹ ہرک، اوپارے کہ ہڑتوم آ ملک آتا نیام اٹ زرگزرانی، واپار، تیل، گیس و معدنیات اٹی کمکاری کن وارخواہی ساڑی ءِ، بلغاریہ نا زرکارآک پاکستان نا زرکاردوست پالیسی تیان فائدہ ہرفر، پاکستان و بلغاریہ علاقائی و جہانی باندات آ اسیجانقطہ نظر تخرہ، ہڑتوم آ ملک آک انسداد دہشت گردی کن کروک آ کوشست آتے ٹی شریدار ءُ، اوپارے کہ بلغاریہ، یورپی یونین نا مارکیٹ اسکان پاکستان نا رسینگ نا مخ تف ءِ۔ ہڑتوم آ ملک آتے پارلیمانی کہول آ رابطہ غاتے پین سوگو کننگ نا گرج ءِ۔ ہڑتوم آ ملک آتا نیام اٹ بڑزکو کہولی ڈل آتا ہن و برآن دوستانہ تعلقداری ءِ پین سوگوی ملک۔ اوپارے کہ کشت وکشار، آئی ٹی و زرگزرانی بشخ آتے ٹی کمکاری کن بھلو وارخواہی اس ساڑی ءِ۔ بلغاریہ نا زرکارآک گوادراٹی ہم زرکاری آن فائدہ ہرفنگ کیرہ، واپاری کمکاری ءِ پین ودفنگ نا گرج ءِ۔ اوپارے کہ پارلیمانی کہول آ ڈل آتا ہن و برآن السی کہول آ رابطہ غاتے پین ودفنگ اٹ کمک رسینگک، پارلیمانی سفارتکاری قوم تے خڑک اتنگ کن اسہ اہم ءُ ذریعہ اسے۔ پاکستان اٹ زرکاری کن بھلووارخواہی اس ساڑی ءِ۔ چیئرمین سینیٹ پارے کہ جہانی فورم تیا پاکستان و بلغاریہ ٹی گچین کمکاری اسہ ایلو آ پت ءِ پاش کیک، ڈیہہ نا شونداری و شونہالی کن امن و سوگوی المی ءِ، پاکستان ڈیہہ ٹی امن نا کوشست آتا مخ تفی ءِ برجاتخک۔ بلغاریہ نا سفیر پاکستان تون ہڑتوم آ کنڈآتا کمکاری ءِ اہم گوندا وپارے کہ پاکستان بلغاریہ کن اہم ءُ ملک اسے۔ اوپارے کہ پاکستان تون تعلقداری تے پین مون آ دننگ نا خواہندار ءِ۔
