اسلام آباد۔ 19جولائی (اے پی پی) ترجمان دفترخارجہ بھارتی وزیر خارجہ نا فیٹف آ سیاست کننگ نا اعتراف آ ردعمل نا درشانی ءِ کرسا پارینے کہ پاکستان، بھارت نا کنڈآن جہانی منی لانڈرنگ و دہشت گردی نا مالی کمکاری آ سیاست کننگ نا اعتراف آن پد، فنانشنل ایکشن ٹاسک فورس انا صدر تون رجوع کننگ آ سجفنگ ءِ۔
دوشنبے نادے آ دفترخارجہ نا ترجمان اسہ بیان اسے ٹی پارے کہ بھارتی بیان آن نئے بیرہ اونا اصل دروشم پاش مسنے بلکن ایف اے ٹی ایف اٹ بھارت نا منفی کڑد انا بارواٹ پاکستان نا دیرینہ موقف نا ہم تائید ءِ کیک۔ ترجمان پارے کہ پاکستان مدام جہانی برادری ءِ ایف اے ٹی ایف نا بطور سیاست کاری کاریم اٹ اتنگ و ہندوستان نا کنڈآن اونا عمل ءِ نسخان تننگ نا بارواٹ تالان کرسا کرینے۔ ترجمان پارے کہ ساڑی آ بھارتی بیان تعصب آ مبنی کوشست آتا بشخ ءِ وخت اس کہ تینا تنگ نظری آ مبنی سیاسی عزم نا پوروی کن پاکستان نا برخلاف اسہ اہم ءُ تکنیکی فورم اسے کاریم اٹ اتنگ آن ہم پدی مفک۔ ترجمان پارے کہ پاکستان مستین اٹ جہانی برادری نا مون آ بھارت نا جھیڑہ ئی کڑد ءِ پاش کرسا کرینے و بھارت نا داساڑی آ اعتراف ءِ ہم ایف اے ٹی ایف و وسیع تر جہانی برادری نا نوٹس اٹ ہم اتیک۔
