اسلام آباد۔ 19جولائی (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستان اٹی اولیکو وار قومی کہول آ ای سپورٹس نا اڈتننگ ستاکڑزک، پاکستانی چناک ہم ای سپورٹس اٹی بشخ ہلسا کروڑ پتی مننگ کیرہ، فری فائر ای سپورٹس ٹورنامنٹ اٹی 567ٹیم بشخ ہلیرہ۔ داخیال آتا درشانی ءِ او دوشنبے نادے آ پاکستان اٹی اولیکو وار ای سپورٹس نا ایونٹ نا اڈتننگ کن ”گیرینا“ تون مفاہمت نا یات داشت آ دستخط نا دود انا وخت آ کرے۔ بنجائی وزیر حوالکاری و شینکاری چوہدری فواد حسین پارے کہ اینو پاکستان اولیکو وار ای سپورٹس اٹ پترینگ انگ ءِ، پاکستان اٹی اولیکو وار قومی کہول آ ای سپورٹس نا ایونٹ اڈتننگ آ خوشی ءِ۔ اوپارے کہ وزارت حوالکاری گیرینا تون دارداٹ مفاہمت نا یات داشت آ دستخط کرینے۔ گرینا دنیانا پنی آ کمپنی ءِ ہرابیگو نا کمک اٹ پاکستان اٹ اولیکو وار فری فائر قومی ٹورنامنٹ اڈتننگ ءِ۔ بنجائی وزیر حوالکاری پارے کہ داگیم اٹی اسہ کروڑ روپئی نا انعام ءِ، کٹوک آ ٹیم جہانی کہول آ مروک آ مقابلہ ٹی بشخ ہلنگ کیک ہراٹی اِراملین ڈالر نا انعام ارے، اوپارے کہ گوازی تیٹی زیات است خواہی تخوک آ چناتتون موقع ءِ کہ او 12سال انا وئی ٹی کروڑ پتی مننگ کیرہ، اوپارے کہ ویڈیو گیم تا جم مارکیٹ 200بلین ڈالر سرتسنے، ای سپورٹس نا کنڈآن نن بھلو گام اس ہرفینن و ننا چناک ہم ای سپورٹس اٹی بشخ ہلنگ کیرہ، اوپارے کہ فری فائر پاکستان اٹی مروک آ اولیکو ای سپورٹس ٹورنامنٹ ءِ، ہندن کہ نن مون آ کانہ دانابھرم مون آبننگ بناکیک۔ اوپارے کہ پاکستان اٹی 567ٹیم داٹورنامنٹ اٹی بشخ ہلیرہ ہراٹی اسہ کروڑ روپئی نا انعام ءُ، داٹورنامنٹ آن ای سپورٹس ءِ مون آ دننگک، بنجائی وزیر حوالکاری پارے کہ دنیا نا بھلا کمپنیک ہم داپول اٹ بریرہ، پاکستانی ورناتے ای سپورٹس نا دروشم اٹ اسہ بھلو موقع اس دُو بننگ ءِ۔
