تاشقند۔16جولائی (اے پی پی): مزن وزیر عمران خان ءَ گوں یورپی یونین ءِ درئی کارانی ءُ سیکورٹی پالیشی ءِ مزن تکی ءُ یورپی کمیشن ءِ نائب صدر جوزف بورریل ءَ آدینگ ءِ روچ ءَ تاشقند ءَ ”سنٹرل اینڈ سائوتھ ایشیا 2021:ریجنل کنکٹویٹی : چیلنجز اینڈ اپرچونٹیز“ ءِ بن گپ ءِ سر ءَ برجم داشتگیں کانفرنس ءِ موہ ءَ گند ءُ نند کت۔ گند ءُ نند ءِ ساھت ءَ پاکستان ءُ یورپ ءِ نیام ءَ کمک ءُ اوگانستان ءِ جاور ھال آنی ھوالگ ءَ ھیال ریچی کنگ بوت۔ مزن وزیر ءَ اوگانستان ءَ ایمنی کار ءُ انٹر اوگان سول ءُ تران آنی واستہ پاکستان ءِ ارزشتی ایں کرد ءِ ھوالگ ءَ چمشانک دات۔ آئی ءَ اے گپ ءِ سر ءَ زور پر داست کہ اے جیڈھ ایوک ءَ اوگان آنی سروکی ءُ آئی منوک بیتگیں سیاسی کار آنی وسیلگ ءَ گیوار بوت کنت ءُ سیاسی جیڈھ ٹوھیں سول ءُ تران آنی ساھیگ ءِ چیر ءَ گیوار بوت کن اَنت۔ مزن وزیر ءَ اوگانستان ءَ گیر ملی اُرد آنی در کنگ ءَ پد میاں اوستمانی برات آنی یک شل ءَ ھوار بوھگ ءِ ارزشت ءِ سر ءَ زور پر دات تانکہ ملک ءَ مھکمیں ایمنی ءِ برجائی ءَ را دل یکیمی کنگ بہ بیت۔ مزن وزیر ءَ اوگانستان ءِ ھراب بوھوکیں جاور ھال ءُ ایشی ءِ پاکستان ءِ سلاتی ءِ سر ءَ نیگیٹیو رند پد آنی ھوالگ ءَ نہ وشی ءِ درشان کت۔ آئی ءَ یورپی یونین ءُ میاں اوستمانی برات آں گوں اوگان لڈ ءُ بار کنوک آنی کمک ءَ را جاڑی دارگ ءِ ضلورت ءِ سر ءَ زور پر دات۔
