اسلام آباد۔ 16جولائی (اے پی پی) وزیر مملکت حوالکاری و شینکاری فرخ حبیب پارینے کہ پاکستان الیکٹرانک میڈیا ریگولیٹری اتھارٹی (پیمرا) نا ضابطہ اخلاق نا خلاف ورزی آ کارروائی کننگک، داتم اسکان 28نا خڑک اشتہار و راگ آتا برخلاف کارروائی کننگا، فحاشی ءِ مون آ دننگ مفک، داڑآ سپریم کورٹ نا پیدوار پارت ساڑی ءِ۔ جمعہ نادے آ قومی اسمبلی ٹی ٹیلی ویژن چینل آتیا ودوک آ بے حیائی نا بابت مولانا عبدالاکبر چترالی، محمد انور، شاہدہ اختر علی، عبدالشکور و صلاح الدین ایوبی نا چکاری نوٹس آ وزیر مملکت فرخ حبیب ایوان ءِ پارے کہ پیمرانا پورو ضابطہ اخلاق ساڑی ءِ۔ پیمرا2015ء ٹی سپریم کورٹ نا پارت آتیا ضابطہ اخلاق مرتب کریسس، اونا رداٹ 365شوکاز نوٹس جاری کننگا وخت اس کہ 28نا خڑک اشتہار و راگ آتا برخلاف کارروائی کننگا۔ دارداٹ دہ لکھ روپئی اسکان جرمانہ کننگک و داتم اسکان دونیم کروڑ نا جرمانہ بیٹ کننگانے۔ وزیر مملکت پارے کہ پیمرا ءِ پارت کننگانے کہ او بروک آ ہفتہ غٹ ٹی وی چینل تے ایڈوائزری جاری کے و او ایڈوائزری نا کاپی اس ایوان اٹ ہم پیش کینہ۔ مولانا عبدالاکبر چترالی نا سوج آ اوپارے کہ اگہ خاص چینل یا راگ اسے آ اعتراض ءِ تو اوفتے تننگے اوڑآ کارروائی مریک۔ پیمراٹی کونسل آف کمپلینٹ نا وڑوڈول ساڑی ءِ و مستین اٹ ہم درخواست آتیاکارروائی مسنے۔ اگہ پیمرانا کوڈ آف کنڈکٹ نا خلاف ورزی مریک تو اوڑآ ضرور کارروائی کننگک۔ مولانا محمدانور نا سوج انا ورندی ٹی او پارے کہ کوڈ آف کنڈکٹ نا پارٹ تھری بھاز پیدوار ءِ، اونا خلاف ورزی آ پیمرانا رداٹ دمدستی ایکشن ہلنگک۔ اوپارے کہ ننا کوشست مریک کہ ننا روایت و قدر انا خلاف ورزی مف۔ شاہدہ اختر علی نا سوج آ وزیر مملکت پارے کہ پیمرانا رداٹ مانیٹرنگ نا مچ آ نظام ساڑی ءِ۔ داکان مست راگ و اشتہار تا بابت اعتراض آتیا اودے آن ایئر مننگ آن توننگا و قابل اعتراض متن ءِ اینک کننگ آ راگ و اشتہار جاری مس، ننا کوشست ءِ کہ سلاہ درشانی نا آجوئی ہم زہمی مف و پیمرانا کانود آہم عملدرآمد ءِ پک کننگ مرے۔ فرخ حبیب پارے کہ باسک آتا بروک آ ہفتہ پیمرا نا دورہ کن بست وبند کننگک تانکہ او تینٹ کار دا بابت طے کروک وڑوڈول نا تینٹ جاچ ءِ ہلنگ کیر۔ عبدالشکور نا سوج آ او پارے کہ داتم اسکان 28نا خڑک اشتہار آتیا پابندی خلنگانے، ننتون دابابت مچ آ لسٹ ارے۔ بھارتی مواد، نازیبا زبان و داوڑنا ایلو باندات آتیا کارروائی مریک، اگہ خاص ءُ چینل اسے نا بابت غاو ارے تو اونا جاچ ءِ ہلنگک۔ سید محمود شاہ و صلاح الدین ایوبی نا سوج آ وزیر مملکت پارے کہ راگ و اشتہار آتا متن ننا بنداوی اساس و روایت آتا رداٹ مرے۔ اوپارے کہ پارلیمان ننا اجتماعی دانش نا ہند ءِ۔ داکان پد ڈپٹی اسپیکر معاملہ ءِ قائمہ کمیٹی حوالکاری و شینکاری نا حوالہ کرے۔
