تاشقند۔ 16جولائی (اے پی پی) وزیراعظم نا سلاہکار قومی سلامتی ڈاکٹر معید یوسف پارینے کہ نن جیو اسٹریٹجک سوچ آن جیواکنامک نا کنڈآ ہِننگ اُن، اوغانستان اٹی امن و غٹ انااواری اٹ مون آ ہِننگ المی ءِ۔ جمعہ نادے آ ”سینٹرل اینڈ ساؤتھ ایشیا2021:ریجنل کنیکٹیوٹی، چیلنجز اینڈاپرچونیٹیز،“ نا سرحال آ کانفرنس نا بنائی سیشن نا وخت آ گپ وتران کرسا اوپارے کہ ازبکستان نا صدر وزیراعظم عمران خان ءِ جم وجوش اٹ بخیر کرے و پاکستان و ازبکستان نا ڈل آتا نیام اٹ بھاز جوان ءُ اوڑدہی اس مس۔ پاکستانی وزیراعظم و ڈل ءِ کاریڈ کارپٹ آن ہم زیات بیابخیرکننگا۔ اوپارے کہ ازبکستان اقتصادی راہداری و کنیکٹیوٹی ٹی ننے آن ہم زیات است خواہی تخک۔ ہراوڑ اوپاکستان نا بزنس کمیونٹی ءِ ٹریٹ کرے و ہرا گپ وتران مس واو بھاز مثبت ءُ۔ اوپارے کہ پاکستان وار وار آ داہیت ءِ پاننگ ءِ کہ نن جیو اسٹریٹجک سوچ آن جیواکنامک سوچ انا کنڈآ ہِننگ اُن۔ جیو اسٹریٹجک نا اہمیت برجاسلک ولے جیو اکنامک نا غٹ آن بھلا پلو اقتصادی راہداری ءِ۔ سنٹرل ایشیاکن دنیا تون رابطہ و بحیرہ عرب اسکان رسینگ نا غٹ آن جوان ذریعہ گوادر و کراچی بندرگاک ءُ۔ اوپارے کہ کنا ازبکستان نا نیشنل سیکورٹی ایڈوائزرتون ہم اوڑدہی مسنے ہرابھاز فائدہ ئی مسنے و اوٹی نن طے کرینن کہ ننے امر مون آ ہنوئی ءِ۔ وزیراعظم نا دورہ نا مسخت پورو مرسا مون آ بننگ ءِ۔ اوپارے کہ پاکستان نا موقف بھاز پیدوار ءِ۔ نن اوغانستان اٹی امن کن کوشست کننگ اُن۔ نن وار وار آ اقتصادی راہداری نا ہیت ءِ کننگ اُن۔ ننا جیو اکنامک وژن و کنیکٹیوٹی کن امن المی ءِ۔ وزیراعظم عمران خان اوغان صدر اشر ف غنی تون اوڑدہی نا خواست ءِ امنا کرینے۔ وزیراعظم اودے باور کرفک کہ پاکستان ہرا گام گیج آتے کننگ ءِ او فتے اوغانستان کن کننگ ءِ۔ ننا کوشست ءِ کہ اوغانستان اٹی امن مرے و غٹ اواری اٹ کار تانکہ اوغانستان اٹی سیاسی مفاہمت مف کہ نکتہ چینی و بدبختی اٹ ہرامنفی بیانک بریرہ اوفتیان پاناد کرسا مون آ ہِننگے۔
