اسلام آباد۔ 16جولائی (اے پی پی) وزیرخارجہ شاہ محمود قریشی پارے کہ وزیراعظم عمران خان و ازبکستان نا صدر شوکت مرزایوف نا نیام اٹ دونیم گھنٹہ نا مرغن ءُ اوڑدہی اس مس، اوڑدہی ٹی ہڑتوم آ راہشونک اوغانستان نا حالیت آتیا گپ وترا ن کریر و اوغانستان اٹی امن و سوگوی کن اواری اٹ کڑد ادا کننگ نا عزم انا درشانی ءِ کریر، پاکستان و ازبکستان اسہ ایلو تون اسٹریٹجک پارٹنر شپ معاہدہ کریر، ہڑتوم آ ملک آتا نیام اٹ مذہبی سیل و سوات نا مون آ دننگ نا بابت ہم گپ وتران مس۔ داخیال آتا درشانی ءِ او تاشقند اٹی وزیراعظم عمران خان نا دورہ ازبکستان نا بابت پی ٹی وی تون گپ وتران کرساکرے۔ اوپارے کہ وزیراعظم عمران خان ڈیہہ نا اہم ملک خاص وڑاٹ اوغانستان نا ہمسایہ ملک پاکستان، ازبکستان، تاجکستان، ایران و ترکی نا وزیرخارجہ غاتے آخبت خڑک اٹ اواری اٹ تولساروڈ میپ اس طے کننگ نا سلاہ پیش کرینے۔ وزیراعظم سلاہ کرے کہ وزیر خارجہ غاتا کنڈآن پیش کروک سلاہ تیا سمٹ مرے، ازبک صدر وزیراعظم نا دا سلاہ نا ستاءِ کرے۔ اوپارے کہ اوغانستان نا حالیت آتیا غٹ ہمسایہ ملک آتے گڑتی ءِ، غٹ ہمسایہ ملک آتا زی آ باہوٹ آتا بننگ نا خلیس ءِ و ڈیہہ نا ملک آتے اوغانستان اٹی خانہ جنگی و نزوری نا خلیس ءِ و کس اس ہم داخواپک کہ دا ڈیہہ داوڑنا حالیت آتا گواچی مرے۔ اوپارے کہ اوڑدہی ٹی ہڑتوم آ ملک آتا نیام اٹ سفری رابطہ غاتیا ہیت مس، ٹرانس اوغان ریلوائی ڈٹ آہم گپ وتران کننگا۔ داریلوائی لائن مزور شریف آن کابل و ہموکان پشاور آ بریک، ریلوائی لائن آن ہڑتوم آ ملک آتا نیام اٹ واپار نا پوسکن ءُ درگہ ملنگک۔ اوپارے کہ پاکستان و ازبکستان اسہ ایلو تون اسٹریٹجک پارٹنر شپ معاہدہ کرینو، دامعاہدہ پاکستان و ازبکستان نا تین پہ تینی تعلقداری تے اسہ پوسکن ءُ ہند اس ایتک، معاہدہ ٹی ہڑتوم آ ملک آتا نیام اٹ آخبت نا تعلقداری تا خدوخال ءِ ہُننگ مریک۔ وزیرخارجہ شاہ محمود قریشی پارے کہ ازبکستان اٹی ساڑی درگاہ تیان برصغیر نا مخلوق نا اسہ روحانی تعلق اسے، داروحانی کشش بھازانگا پاکستانی تے ازبکستان آ اتیک۔ داکان بیدس برصغیر اٹی مغل آرٹ اینڈ کلچر نیامی ایشیائی ملک آتیان بسنے، داکشش ازبکستان نا مخلوق ءِ پاکستان آ بننگ آ بیوس کیک، کنے اومیت ءِ کہ لاہور کون آ شار ازبک مخلوق ءِ بھاز وڑک، ہنداوڑ ہڑتوم آ ملک آتا نیام اٹ مذہبی سیل و سوات نا مون آ دننگ نا بابت ہم گپ وتران مس۔ اوپارے کہ اوڑدہی ٹی پاکستانی ورناتے کن میڈیکل اسکالر شپ نا بابت گپ وتران مس، ہڑتوم آ ملک آتا خڑکی ءِ مون آ دننگ کن فیصلہ مس کہ اول مغل بادشاہ ظہرالدین بابر آ اسہ اسیجائی ءُ فلم اس جوڑ کننگک۔ دافلم ہڑتوم آ ملک آتا الس ءِ اسہ ایلوتون گنڈک۔ وزیرخارجہ شاہ محمود قریشی پارے کہ ہڑتوم آ ملک آتا نیام اٹ سیکورٹی و دفاع نا باندات آہم گپ وتران مس۔ جم وڑاٹ ہڑتوم آ راہشون تا نیام اٹ بھاز جوان ءُ اوڑدہی اس مس۔ طے مس کہ ہڑتوم آ ملک آتا نیام اٹ تعلقداری تا مون آ دننگ کن اسہ روڈ میپ اس طے کننگک، داروڈ میپ آ ہرشش تُوآن پد نظرثانی کننگک و جاچ ءِ ہلنگک کہ فیصلہ غاتیا ہراحداسکان عملدرآمد مسنے۔
