تاشقند۔ 16جولائی (اے پی پی) وزیرخارجہ مخدوم شاہ محمود قریشی پارینے کہ ڈیہہ ٹی زرگزرانی و اقتصادی شونداری کن تین پہ تینی رابطہ المی ءِ، ”ٹرانس اوغان ریلوائی پروجیکٹ،“ ازبکستان ءِ براستہ اوغانستان، پاکستان تون ملفک، اگہ اوغانستان نا حالیت آتیٹی جوانی بریک تو نن داڈٹ آ مون آ ہِننگ کن تیار اُن، گوادر پورٹ ڈیہہ ٹی اقتصادی سرجزآتا جاگہ اس جوڑ مننگ کیک، نیامی و سویلی ایشیائی رابطہ کانفرنس اٹی وزیراعظم عمران خان نا اوغان صدر تون اوڑدہی ٹی اوغانستان نا ساڑی آ حالیت آتیا ہیت مریک۔ اوداخیال آتا درشانی ءِ جمعہ نادے آ تاشقند اٹی وزیراعظم عمران خان نا دورہ ازبکستان و نیامی ایشیارابطہ کانفرنس نا بابت تینا ویڈیو بیان اٹی کرے۔ وزیرخارجہ پارے کہ تاشقند اٹی نیامی و سویلی ایشیائی رابطہ کانفرنس اس اڈتننگ انگ ءِ، ہراٹی وزیراعظم پاکستان بشخ ہلنگ ءِ۔ وزیراعظم عمران خان داکانفرنس اٹی پاکستان نا نمائندگی ءِ کرسا گپ وتران کیک۔ پاکستان سرپند مریک کہ اگہ ننا ننا ڈیہہ ءِ زرگزرانی و اقتصادی وڑاٹ مون آ ہنوئی ءِ تو، تین پہ تینی رابطہ بھاز المی ءِ۔ اوپارے کہ درو، ازبکستان نا صدر و وزیر خارجہ تون وزیراعظم عمران خان نا و کنا اوڑدہی مس، اوٹی نن تین پہ تینی رابطہ نا اہمیت آ سیر حاصل گپ وتران کرین۔اوپارے کہ ”ٹرانس اوغان ریلوائی پروجیکٹ،“ ازبکستان ءِ براستہ اوغانستان، پاکستان تون ملفک، دا بابت ہم ننا سرجم گپ وتران مس، نقشہ غاتا تبادلہ مس، و نن مچ آ روٹ انا جاچ ءِ ہلکن۔ داڈٹ اٹی دقت بیرہ اوغانستان نا حالیت آتا سوب بننگ ءِ۔ اگہ اوغانستان نا حالیت آتے ٹی گچینی بریک تو نن دا ڈٹ آ مون آ ہِننگ کن تیار اُن، پاکستان دا ڈٹ انا فزیبلیٹی کن ورلڈ بینک اتون مہالوآن رابطہ ٹی ءِ۔ نن گوادر ءِ ڈویلپ کننگ اُن۔ ننا بندرگاہ،(او گوادر مرے یا پورٹ قاسم)، لینڈ لاک نیامی ایشیاو اوغانستان ءِ سمندر اسکان رسینگ نا گونڈ ءُ کسر اس فراوان کیک، ہراڑآن داملک آتا واپار ءِ مون آ دننگک۔ مخدوم شاہ محمود قریشی پارے کہ ہنداوڑ ڈیہہ ٹی گوادر پورٹ، اقتصادی سرجزآتا وت جوڑ مننگ کیک۔ دا تین پہ تینی رابطہ غان ڈیہہ ٹی اسہ خوشگوار ءُ بدلی اس ممکن ءِ و پاکستان دا رداٹ تینا کڑد ءِ ادا کننگ ءِ۔ کانفرنس نا وخت آ ننا اِرااہم نشست ہم مریک۔ اوغانستان نا صدر تون اوغانستان نا ساڑی آ حالیت آتیا گپ وتران مریک۔ یورپی یونین نا بڑزکو نمائندہ جوزف بوریل تون ہم اوڑدہی مریک و اوغانستان آ شرہ مریک۔ کنا ایمبیسیڈر زلمے خلیل زاد تون ہم داسرحال آ گپ وتران مسنے۔
