اسلام آباد۔ 16جولائی (اے پی پی) وزیراعظم عمران خان جمعہ نادے آ چین نا وزیراعظم لی کے چیانگ تون ٹیل فون آ گپ وتران اٹی داسوٹی مروک آ است ہسون شکست اٹی چین نا شاری تا نہادی جانی نسخان آ ہڑزخواہی نا درشانی ءِ کرے۔ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ پاکستان نا الس پدسلوک آ خاہوت نا غم و فریشانی ٹی بریبر نا شریک ءُ۔ حکومت ٹھپی چینی باتی تے گچین طبی آسراتی فراوان کننگ ءِ۔ وزیراعظم باور کرفے کہ داواقعہ نا پورو جاست وپاست ءِ کننگک۔ پاکستان اٹی رہینگوک آ چینی باتی و چندی ڈٹ و ادارہ غاتے ٹی کاریم کروک آ کارندہ غاتے رکھ فراوان کننگ حکومت نا اولیت ءِ۔ وزیراعظم داہیت انا درشانی ءِ کرے کہ پاکستان وچین سنگت ءُ و ننا سنگتی وخت انا ہرآزمائشت اٹ پورو سلیسونے۔ وزیراعظم پارے کہ مخالف واکدارتے پاکستان و چین نا برادرانہ تعلقداری تے نسخان تننگ نا موکل تفننگک۔
