تاشقند۔ 16جولائی (اے پی پی) وزیراعظم عمران خان پارینے کہ اوغانستان اٹی خراب حالیت آتیان غٹ آن زیات پاکستان زہمی مریک، طالبان تے مذاکرات نا میز آ اتنگ کن پاکستان آن زیات کس اس کڑد ادا کتنے، پاکستان آ دوبہ خلنگ آن کنے مایوسی مس، طالبان تے مذاکرات نا سلہ ءِ درملکی فوج انا پیش تمنگ آن مست خلوئی ئسک، سی پیک علاقائی رابطہ غاتے ٹی ہم اہم ءُ کڑد اس اداکیک، اوغانستان نیامی و سویلی ایشیانا نیام اٹ پول انا کڑد ادا کننگ کیک۔ وزیراعظم عمران خان جمعہ نادے آ تاشقند اٹی ”سینٹرل اینڈ ساؤتھ ایشیا2021: ریجنل کنیکٹیوٹی: چیلنجز اینڈ اپرچونیٹیز“ نا سرحال آ کانفرنس آن تران کریکہ۔ اوپارے کہ سی پیک بی آر آئی نا فلیگ شپ ڈٹ اسے، اومیت کینہ کہ سی پیک علاقائی رابطہ غاتے ٹی ہم اہم ءُ کڑد اس اداکیک، گوادر پورٹ آ زرگزرانی سرجزآک مارچ 2019ء آن بناکرینو۔ وزیراعظم پارے کہ اوغانستان نیامی و سویلی ایشیانا نیام اٹ پول انا کڑد ءِ ادا کننگ کیک، ننا اولیت اوغانستان اٹی سوگوی ءِ، اوغانستان اٹی بدامنی نا اثر پاکستان آہم مریک۔ اوپارے کہ اوغانستان اٹی خراب حالیت آتیان غٹ آن زیات پاکستان زہمی مریک۔
وزیراعظم عمران خان پارے کہ پاکستان اٹی دہشت گردی آن 70ہزار آن زیات جان قربان مس،طالبان تے مذاکرات نا میز آ اتنگ کن پاکستان آن زیات کس اس کڑد ادا کتنے، اوپارے کہ پاکستان طالبان تے مذاکرات نا میز آ اتنگ کن ہرممکن کوشست کرے۔ پاکستان آ خلوک آ دوبہ غاتا ذکر ءِ کرسا وزیراعظم عمران خان پارے کہ کنے داہیت آ مایوسی مسنے کہ پاکستان آ دوبہ خلنگک۔ اوپارے کہ طالبان تے مذاکرات نا سلہ ہمووخت آ خلوئی ئسک ہراتم امریکہ نا غٹ آن زیات فوجی اوغانستان اٹی ئسر، داسہ طالبانک انت اکن امریکہ نا ہیت ءِ منرہ ہراتم کہ اوغانستان آن فوجیک پیش تمنگ ءُ۔ وزیراعظم پارے کہ کشمیرنا ویل پاکستان و بھارت نا نیام اٹ غٹ آن بھلا ویل ءِ۔ داکان مست تاشقند نا انٹرنیشنل کانگرس ہال آ سرمننگ آ وزیراعظم عمران خان نا ازبکستان نا صدر شوکت مرزایوف اودے جم و جوش اٹ بخیرکرے۔ ازبکستان نا صدر کانفرنس ہال اٹی وزیراعظم عمران خان نا بیابخیری کن مہالوآن ساڑی ئسک، ہڑتوم آ راہشونک کانفرنس نا بنامننگ آن مست زرس اہم باندات آتیا گپ وتران کریر۔ کانفرنس اٹی وزیراعظم عمران خان آن بیدس اقوام متحدہ نا سیکرٹری جنرل و اوغانستان نا صدرئسک ہم بشخ ہلنگ ءُ۔
