تاشقند۔ 16جولائی (اے پی پی) وزیراعظم عمران خان پارینے کہ پاکستان و ازبکستان نا کاروباری تپہ غاتے کن اسیجائی ڈٹ آتا بناءِ کننگ نا وارخواہی ارے، السی راجی آسراتی نا ڈٹ آتیا کابینہ ٹی دمدستی فیصلہ کننگک، بیوروکریسی و پوریاگر تپہ نا بابت نیب انا کانود اٹی ترمیم کینہ، پاکستان اٹی فارماسیوٹیکل نا بشخ اٹی برآمدآتا کچ بھاز زیات ءِ، صنعتی بشخ انا است بڈی ءِ کینہ، ایس ایم ایز نا بشخ انا کانود اٹی آسانی کن گام گیج کننگ انگ ءِ، پوریاگر آتا بابت نیب انا کانود اٹ ترمیم کینہ۔ وزیراعظم عمران خان تاشقند اٹی پاکستانی پوریاگر برادری تون گپ وتران اٹی پارے کہ ستمبر اٹی ازبکستان نا صدر نا دورہ پاکستان نا گمان ءِ۔ اوپارے کہ ہراتم حکومت کمک کیک و آسانی ودی کیک تو کاروبارنا شونداری ٹی کمک رسینگک۔ وزیراعظم عمران خان پارے کہ کابینہ ٹی السی راجی آسراتی نا ڈٹ آتیا دمدستی فیصلہ کننگک۔ اوپارے کہ چندی ادارہ غاتے کن نجی بشخ آن قابل و لائخ سروک آتا تقرری ٹی مشکل مون تروک ءِ انتئے کہ نجی بشخ انا لائخ بندغ آک نیب انا گڑاس کانود نا سوب آن سرکاری ادارہ غاتا کماشی ءِ کننگ آن پاناد کیرہ۔ اوپارے کہ سرکاری ادارہ غاتا گچینی کن نجی بشخ آن لائخ بندغ آتا تقرری و بیوروی کریسی آن بیدس پوریاگر آتا بابت نیب انا کانود اٹی ترمیم کینہ۔ وزیراعظم عمران خان پارے کہ پاکستان نا دوائی جوڑ کننگ نا بشخ اٹی پبی کچ ساڑی ءِ ولے ڈرگ ریگولیٹری اتھارٹی نا بابت گڑاس ویل مون تروک ءِ ہرافتا ایسری کن بنجائی حکومت و ڈاکٹر فیصل سلطان گام گیج کننگ ءُ۔ اوپارے کہ قومی زرگزران نا شونداری کن حکومت نا ادارہ غاک ہروڑنا ممکنہ آسراتی فراوان کیرہ۔ وزیراعظم پارے کہ سلاہکار واپار و وزیر خزانہ کاروبار نا شونداری نا اہمیت آن معلومدار ءُ و او دا تکرہ کہ کاروبار نا مون آ دننگ آن ریونیو ءِ ودفسا وام تے پدی تننگ کینہ۔ اوپارے کہ حکومت ملک اٹی ایس ایم ایز نا بشخ انا مون آ دننگ کن گام گیج کرینے و بنجائی وزیر خزانہ شوکت ترین دا بابت اسہ جامع پالیسی اس تیار کننگ ءِ۔ وزیراعظم پارے کہ کاروباری بشخ انا بے گرج کانوداٹی کمتی و کاروباری آسانی تا فراوانی نا بابت زرکاری بورڈ خاطرخواہ گام گیج کرینے۔ اوپارے کہ پوریاگر برادری نا آسراتی کن حکومت سنبرینگوک ءِ، حکومت ہندی و درملکی زرکارآتا آسراتی کن گام گیج کننگ ءِ۔ اوپاکستان و ازبکستان نا کاروباری صنعت کار برادری آ زور شاغا کہ او کشت وکشار، دوائی جوڑ کننگ، ٹیکسٹائل تون اوار چندی بشخ آتے ٹی اسیجائی ڈٹ آتے کن گام گیج کیر و دا بشخ آتے ٹی اسیجائی ڈٹ آتا بھلو وارخواہی اس ساڑی ءِ۔ وزیراعظم عمران خان پارے کہ حکومت کاروباری برادری نا شونداری نا خواہندار ءِ ولے کاروباری تپہ ءِ ہم مرے کہ او سہی خراج ایتر۔ پاکستان نا کاروباری برادری تون گپ وتران اٹی بنجاایوان ہائے صنعت و واپار پاکستان نا صدر ناصرحیات مگوں، گوجرانوالہ ایوان صنعت و واپارتون گنڈوک عمراشرف مغل، ایمپلائرز فیڈریشن آف پاکستان آن بیدس چندی بشخ آتون گنڈوک کاروباری وصنعت کار برادری وزیراعظم عمران خان ءِ سلاہ پیش کرسا پاریر کہ ملک اسے تون اولیتی واپار نا معاہدہ کرسا ہندی صنعت نا رکھ ءِ مون آ تخنگے۔ اوبلین ٹری سونامی و کوویڈ مینجمنٹ آ حکومت نا گام گیج آتا ستاءِ کریر و پاریر کہ صنعتی شونداری نا کمک اٹ زرگزران نا مون آ دننگ نا گرج ءِ۔ حکومت نا کمکاری آن قومی برآمدآتے ٹی پین ودکی مننگ کیک۔ اوسلاہ پیش کریر کہ ایس ایم ایز و ویلیو ایڈیشن نا بشخ آتا شونداری کن خاص گام گیج آتا گرج ءِ۔ کاروباری برادری تون وزیراعظم نا گپ وتران نا دود اٹی وزیر خارجہ مخدوم شاہ محمود قریشی وسلاہکار واپار و زرکاری عبدالرزاق داؤد ئسک ہم ساڑی ئسر۔ داوخت آ پاکستانی ڈل اٹی اوار کاروباری برادری ملک اٹ کاروبار، صنعت و برآمد آتا مون آ دننگ نا بابت وزیراعظم عمران خان ءِ جامع سلاہ پیش کریر۔ وزیراعظم عمران خان اوفتے باورکرفے کہ حکومت کاروباری تپہ نا مشکل آتا چٹفنگ کن سنبرینگوک ءِ۔
