تاشقند۔ 15جولائی (اے پی پی) وزیرخارجہ مخدوم شاہ محمود قریشی پنچ شنبے نادے آ تاشقند اٹی وزیراعظم ازبکستان عبداللہ عارفوف تون اوڑدہی کرے۔ گپ وتران اٹی ہڑتوم آ کنڈآتا تعلقداری، چندی بشخ آتے ٹی ہڑتوم آ کنڈآتا کمکاری و علاقائی حالیت آتیا گپ وتران کننگا۔ وزیرخارجہ پارے کہ پاکستان ازبکستان تون اوار نیامی ایشیائی ملک آتون رابطہ غاتے خاص اہمیت ایتک۔ ازبکستان تون تاریخی، مذہبی و دودوربیدگی بنداوتیا استوار برادرانہ تعلقداری ءِ۔ شاہ محمودقریشی پارے کہ پاکستان و ازبکستان نا نیام اٹ ہڑتوم آ کنڈآتا کمکاری نا بھلو گمان اس ساڑی ءِ۔ وزیرخارجہ سویل و نیامی ایشیائی ملک آتا کانفرنس نا اڈتننگ آ وزیراعظم ازبکستان ءِ مبارکبادی تس و پارے کہ وزیراعظم عمران خان نا دورہ ازبکستان و داکانفرنس اٹی بشخ ہلنگ، آن ہڑتوم آ ملک آتا نیام اٹ ہڑتوم آ کنڈآتا تعلقداری پین سوگو مریک۔ اوپارے کہ وزیراعظم عمران خان نا دورہ، زرگزرانی شریداری و ڈیہہ ٹی اقتصادی، واپاری و کثیر الجہتی رابطہ غاتے ودفنگ اٹی ہم کمکار مریک۔
