تاشقند۔ 15جولائی (اے پی پی) وزیراعظم عمران خان پاکستان و ازبکستان نا پیڑی تیامتکن تاریخی، دودوربیدگی و روحانی تعلقداری نا اہمیت ءِ تالان کرسا پارینے کہ ہڑتوم آ ملک آتا نیام اٹ واپاری و ہڑتوم آ کنڈآتا رابطہ غاتا پین مون آ دننگ آن ڈیہہ ٹی شونداری وشونہالی نا پوسکن ءُ کسر ملنگک، پاکستان نیامی ایشیاءِ ایلو دنیاتون ملفنگ و واپار نا وت اس جوڑ کننگ نا پبی لائخی تخک۔ پاکستان ازبکستان ءِ تینا بندرگاہ تا کمک اٹ دے ٹک نیامی و افریقہ اسکان رسینگ تننگ کیک، ہمسایہ ملک آتا نیام اٹ واپار آن مخلوق نا زند انا آب بڑزمریک، اوغانستان اٹی پرامن سیاسی ایسری نا خواہندار اُن، اوغانستان اٹی امن ڈیہہ کن اہم ءِ، اوغانستان اٹی حالیت آتا گچین مننگ آن پاکستان، اوغانستان، ازبکستان ریلوائی ڈٹ ءِ ایسراسکان سرکننگ اٹ کمک رسینگک۔ اوداخیال آتا درشانی ءِ پنچ شنبے نادے آ داڑے”نیامی و سویلی ایشیا2021، علاقائی رابطہ غاتا چیلنج و وارخواہی“ نا سرحال آ پاکستان ازبکستان بزنس فورم آن تران کرساکرے۔ وزیراعظم پارے کہ اودے ازبکستان نا دورہ غان است اٹ خوشی مسنے۔ پاکستان و ازبکستان نا تاریخی، دودوربیدگی و روحانی رابطہ ءِ۔ پاکستان و ازبکستان نا الس نا پڑی تیا متکن تعلقداری ءِ۔ ازبکستان نا وزیراعظم وکاروباری برادری ءِ باور کرفنہ کہ ننا دا تعلقداری داسہ بناءِ۔ نن اومیت آن پُر اُن کہ دا تعلقداریک پین سوگو مریرہ۔ وزیراعظم پارے کہ پاکستان اٹی دادورہ نا اہمیت و جوش و جوزہ نا کساس ءِ داہیت آن خلنگ مریک ہراتم او جہاز اٹی سوار مسکہ تو بھلو کچ اسے ٹی پاکستانی کاروباری شخصیت آک اونا موبائل فون آ دورہ کن بٹنگ پننگ نا شکوہ کریرہ۔ وزیراعظم پارے کہ ننا کاروباری و واپاری تعلقداری نا سیبو داہیت آٹی ءِ کہ نن اخس زوت اسہ ایلو تون رابطہ غاتے عملی وڑاٹ مون آ دینہ۔ اوغانستان نا کسرریلوائی ڈٹ پاکستان و ازبکستان ہڑتوم آ ملک آتے کن بھازاہمیت تخک۔ داڈٹ ازبکستان ءِ پاکستان نا 22 کروڑ بندغ آتون ملفک و ولدا ننا بندرگاہ تا کمک اٹ افریقہ و دے ٹک نیامی آن ہم مون آ بھلا مارکیٹ آتسکان رسینگ نا موقع دوبریک و پاکستان ازبکستان نا کسر نیامی ایشیاتون گنڈنگک ہراکہ نیامی ایشیانا بھلا ریاست ءِ و ازبکستان ننے نیامی ایشیا و اوکان مون اسکان رسینگ نا ذریعہ جوڑ مننگ کیک۔ وزیراعظم پارے کہ ازبکستان نا صدر ہم پاکستان تون تعلقداری تے سوگو کننگ اٹ بھاز است خواہی تخک و ہنداوڑنا است خواہی ننے ہم ارے کہ اوغانستان اٹی امن مرے و نن ہموڑے سیاسی ایسری کن پراومیت اُن انتئے کہ اوغانستان نا کسر رابطہ غان ہڑتوم آ ملک آتے فائدہ مریک۔ کاروباری تپہ داڑآن فائدہ ہرفک و مخلوق نا زند انا آب ہم بڑزمریک۔ وزیراعظم پارے کہ اونا زمانہ طالب علمی ٹی ہراتم یورپی یونین جوڑ مس تو ہراملک آک ہم یورپی یونین اٹ بشخ ہلکر ہموجاگہ نا مخلوق نا زند انا آب بڑزمریک۔ ہراتم ہمسایہ ملک آتا نیام اٹ واپار ودک تو مخلوق نا زند انا آب ہم بڑزمریک۔ ہنداسوب ءِ کہ دادور ننکن بھاز اہمیت تخک۔ نن اومیت کینہ کہ پاکستان و ازبکستان نا کاروباری برادری نا نیام اٹ رابطہ غاتے مون آ دننگک۔ درو ہڑتوم آ ملک آتا کاروباری بشخ خاص وڑاٹ ٹیکسٹائل نا بشخ اٹی معاہدہ مسنے۔ اوپارے کہ ہراتم دارابطہ غاک زیات مریرہ تو داڑآن فضائی رابطہ غاک ہم ودرہ و نن ازبکستان کن جہاز آتا کچ ءِ ودفنگ نا خواہندار اُن۔ وزیراعظم پارے کہ اونادورہ نا اسہ بھلا مسخت داہم ارے کہ او بخارا و ثمر قند آ ہِننگ نا چاری ءِ۔ اوپارے کہ تاریخ نا طالب علم نا حیثیت اٹ او ازبکستان نا تاریخ آن ازبکستان نا مخلوق آن ہم زیات واقفیت تخک،۔ نن پراومیت اُن کہ اوغانستان اٹی حالیت آتا گچین مننگ آن ریلوائی نا بھلا ڈٹ ءِ مون آ دننگ اٹ کمک رسینگک۔ داکان مست ازبکستان نا وزیراعظم عبداللہ عارفوف پارے کہ پاکستان و ازبکستان نا نیام اٹ واپار ءِ مون آ دننگ کن بھلو وارخواہی اس ارے۔ وزیراعظم عمران خان نا دورہ ٹی چندی معاہدہ و مفاہمت نا یات داشت آتیا دستخط ہم کننگک۔
