پاکستان موسمیاتی بدلی تیان زہمی مروک آ ملک ءِ، ننے تینا کشاری پیدوار ءِ ودفوئی مریک، وزیرخارجہ مخدوم شاہ محمو د قریشی نا دود آن تران

اسلام آباد۔ 07جولائی (اے پی پی) وزیرخارجہ مخدوم شاہ محمود قریشی پارے کہ کشاری ملک اس مننگ نا ناطہ ننے تینا کشاری پیدوار ءِ ودفوئی مریک۔ تھرغٹ آن زیات گوجالنگوک آ علاقہ ءِ، تدوک آ ہفت دہائی ٹی ہموجاگہ نا حکومت آک مخلوق ءِ ساف ءُ دیر ہم تننگ کتوس۔ چارشنبے نادے آ ”کلائمیٹ۔ سمارٹ ایگریکلچراینڈ فوڈ سیکورٹی“ نا سرحال آ نیشنل ایگریکلچرل ریسرچ سینٹراٹی اڈ ہلوک آ دود آن تران کرسا وزیرخارجہ پارے کہ کنا باوہ و پیرہ نا عمرکوٹ و تھراتون تعلق مسنے، داہموعلاقہ غاک ءُ ہرافتے غٹ آن زیات گوجالنگانے۔ ہراتم ای گچین کاری تا چرجوئی ٹی تھرپارکر و عمرکوٹ نا دورہ ءِ کریٹہ تو مخلوق ساف دیر انا خواست کریکہ۔ بھازانگاک لڑدنگا دیر انا سوب آن چندی ناجوڑی تا گواچی ءُ، بدبختی اٹ تدوک آ ہفت دہائی ٹی ہموجاگہ نا حکومت آک اوفتے ساف ءُ دیر ہم تننگ کتوس۔ اوپارے کہ اگہ نم اوفتے جوان ءُ وارخواہی فراوان کیرے تو دافک مون آ کارہ۔ وزیرخارجہ پارے کہ پاکستان، موسمیاتی بدلی تیان زہمی مروک آ ملک ءِ۔ اوپارے کہ ای دیر انا بابت بلوچستان نا مخلوق ءِ سندھ انا غاو کرسا و سندھ ءِ پنجاب نا غاوکرسا بنگونٹ۔ انتئے کہ دیر بھازاہم ءِ۔ اسہ وخت اٹی نن بھلو دیر والو ملک اس شمار کننگانہ و اینو ننے دیر انا کمتی مون تروک ءِ۔ وزیرخارجہ پارے کہ ای ایگریکلچرل ریسرچ نا منت وار اُٹ کہ او کشاری مشکل آتا مون ءِ توننگ کن چندی ایسر مون آ اتنگ ءِ۔ تھر انا مخلوق روزگار نا پٹنگ اٹ سرگڑداں خننگرہ انتئے کہ اوفتا علاقہ غاتے ٹی روزگار نا وارخواہی مفننگ نا بریبر ءِ۔ انت ہموڑے تعلیم و جان جوڑی نا بشخ آتیا چکار کننگ انگ ءِ؟ ہموڑے پوسکن ودی مروک آ چناتا مرک آتا کچ بھاز زیات ءِ۔ ہراتم خولم، کنوئی آ تیل پاکستان ءِ درآمد کروئی تمک تو ننے افسوز مریک۔