ممبئی۔ 07جولائی (اے پی پی) بالی ووڈ انا پنی آ اداکار و ٹریجڈی کنگ دلیپ کمار 98سال انا وئی ٹی کزیت کرے۔ دلیپ کمار نا ترجمان فیصل فاروقی اونا مرک ءِ پک کرسا اونا ٹویٹر اکاؤنٹ آ کلہو اس جاری کرے ہراٹی او پارینے کہ بھاز ڈکھیائی اٹ او دلیپ کمار نا کزیت ءِ پک کننگ ءِ۔ دلیپ کمار نا ڈاکٹر جلیل پالکر پارے کہ اوآخیریکو ساہ ءِ چارشنبے نا سہب اتون 7بجہ ءُ 30منٹ آ ہلک۔ ڈاکٹر جلیل نا پاننگ ئس کہ اونا مرک انا سوب بھلو وخت اسے آن برجاناجوڑیک ءُ۔ دلیپ کمار 6جون آ ساہ ہلنگ اٹ دشواری نا غاو کریسس اوکان پد اودے ہسپتال اٹ داخل کننگا۔ دلیپ کمار نا کزیت آ بھارتی وزیراعظم نریندر مودی تینا ٹویٹ اٹی دلیپ کمار نا مرک ءِ دودوربیدگی دنیاکن اسہ نسخان اس گوندانے۔ اوپارے کہ دلیپ کمار ءِ سینما نا دنیاٹی بطور لیجنڈ یات تخنگک، اودے اسہ ہندن ءُ ٹیلنٹ اس تننگاسس ہرانا ہچ ءُ مٹ اس اف و اوتینا فن انا کمک اٹ نسل درنسل مداح تے تینا گرفت اٹ ہلکونے۔ اودلیپ کمار نا خاہوت، سنگت و مداح تتون ہم است ہسونی نا درشانی ءِ کرے۔ دلیپ کمار ءِ بالی ووڈ اٹ ”ٹریجڈی کنگ“ پاننگاکہ و اونا پنی آ فلم آتے ٹی ”مغل اعظم، دیوداس، نیادور و رام و شام“ اوار ءُ۔ اونا کیریئر 5دہائی تیا تالان ءِ اونا آخیریکو فلم ”قلعہ“(1998) ئس
