اسلام آباد۔ 29جون (اے پی پی) بنجائی وزیر خزانہ شوکت ترین پارینے کہ 74سال انا تاریخ اٹی اولیکو وار پاکستان اٹی غریب الس نا راجی آسراتی و شونداری و شونہالی کن روڈ میپ اس تننگانے دانا مستین اٹ درور ملیپک، خراج دُز آتا برخلاف کارروائی کن انکم خراج ایکٹ نا شق 203اٹی اصلاحات اتنگانے ہرانا کمک اٹ خراج دُزآتے دزگیر کینہ، ہراتم اسکان خراج ٹو جی ڈی پی نا شرح ءِ 20درسد اسکان اتپنہ حالیت آک گچین مفسہ، ملکی تاریخ اٹی اولیکو وار کشت وکشار نا بشخ اکن بنجائی حکومت 62ارب روپئی نا بجٹ جتا کرینے، داکان بیدس کھد آتیا ہم سبسڈی تننگک۔ ہچ ءُ پوسکن ءُ خراج اس خلنگتنے، پوریاگر صارف آتیان ہرا خراج آتے ہلینہ نن اوفتیان او سیلز خراج ءِ وصول کینہ۔ سے شنبے نادے آ قومی اسمبلی ٹی مالی بل 2021-22آ اولیکو خواندگی نا وخت آ شرہ ءِ چٹفسا بنجائی وزیر خزانہ شوکت ترین پارے کہ اودے گمان ئس کہ اینو مالیاتی بل اٹ ترمیم آ شرہ مریک ولے اونا جاگہ غا ننے تقریر آتے ہُننگ رسینگا۔ 74سال انا تاریخ اٹ اولیکو وار پاکستان اٹ غریب الس نا راجی آسراتی و شونداری و شونہالی کن روڈ میپ اس تننگانے دانا مستین اٹ درور ملیپک۔ ہراتم 40لکھ مخلوق ءِ اُراملک، کشت و کشار و کاروبار کن سود آن پاک وام فراوان مریک تو اوڑآن ملک اٹ شونہالی بریک و اپوزیشن فارغ مریک۔ اوپارے کہ اِرغ، پچ، و ہند انا نعرہ مستین اٹ ہم خلنگاسس، ساڑی حکومت اوڑآ عملدرآمد کرے۔ بجٹ اٹ ہراہدف آتے تننگانے نن اوفتے پورو کرسا نشان ایتنہ۔ کبینی نا ذکر ءِ کرسا وزیر خزانہ پارے کہ داوخت آ بنداوی افراط زر 7درسد نا کچ آٹے ہرااوفتا دور حکومت اٹی ہم ئس۔ غذائی افراط زر اٹی ودکی مسنے، دانا بنداوی سوب دادے کہ مستین اٹ کشت وکشار آ پیسہ خڑچ کننگتو، کشت وکشار اٹ زرکاری مفننگ نا سوب آن نن بورہ، خولم، دال و ایلو غذائی گڑاتا درآمد آ زرمبادلہ ءِ خڑچ کننگ اُن۔ داوخت آ جہانی مارکیٹ اٹ غذائی گڑاتا نہاد آک دہ سال انا بڑزکو انگا کچ آ ٹو۔ داحالیت آتون مون تننگ کن ننے تینا کشت وکشار و کشاری پیدوار ءِ شونداری تروئی ءِ۔ مالی سال 2017-18ء ٹی کشت وکشار آ 1.6ارب روپئی خڑچ کننگا وخت اس کہ پوسکن آ مالی سال انا بنجائی بجٹ اٹی حکومت کشت وکشار نا شونداری کن 63ارب روپئی تخانے، کھد و جوجک کسفوک دوائی تیکن بالترتیب 100ارب روپئی ودکی ءُ۔ وزیر خزانہ پارے کہ لس بندغ نا زند انا آب ءِ بڑز کننگ کن نن ٹرکل ڈاؤن آ سیبو کپنہ۔ چل لکھ اُراتا کٹیاٹی ودکی کننگک ہرانا نتیجہ ٹی نیزگاری کم مریک و چار آن پنچ سال اٹی شونہالی مریک۔ اوپارے کہ اپوزیشن باسک آتا کنڈآن آئی ایم ایف نا ذکر ءِ کننگانے۔ ہراتم 20ارب ڈالر نا نسخان میرات اٹی ملا تو آئی ایم ایف آ ہنوئی تمک۔ آئی ایم ایف سخت شڑت آتیا معاہدہ کرے۔ اوکان پد کورونا دین انا جہانی دین بس ہراٹی مچ آ دنیا نا زرگزران تیٹی منفی گروتھ مس۔ تنقید میرٹ آ بایدے مرے۔ تنقید اٹ بروک آ سلاہ تے نن میرٹ آ چیک کینہ۔ اوپارے کہ ایف بی آر ءِ دزگیری نا اختیار تننگ نا تاثر سہی اف بیرہ سیکشن 203اٹی اصلاحات کننگانے۔ دزگیری نا اختیار ایف بی آر تون اف بلکن تھرڈ پارٹی سسٹم نا بنداو آمریک ہرانا اسہ کمیٹی اس مریک ہرانا کماشی ءِ ای تینٹ کیوہ۔ وزیرخزانہ پارے کہ رزاک اٹ خراج ءِ ڈکھنگ و تفروک آتے نن ہلنگ کپنہ۔ بجٹ اٹ نن خراج آتے معقول کرینن۔ آن لائن کاروبار آ ہچ ءُ خراج اس اف بیرہ غیر رجسٹرڈ کاروبار آ اِرادرسد خراج خلنگانے۔ کنوئی آ خور، تنخواہ دار تپہ کن میڈیکل و پنشن آ خراج نا سلاہ تے پدی ہلنگانے۔
