اسلام آباد۔ 29جون (اے پی پی) اسپیکر قومی اسمبلی اسد قیصر و ڈپٹی اسپیکر قاسم خان سوری ئسک پارینو کہ پارلیمان الس نا است خواہی تا ترجمان و کانودسازی نا غٹ آن مقدم ادارہ ءِ و دانا سوگوی ٹی جمہوریت نا بقاءِ، پارلیمان نا شرف و اونا تقدس ءِ برقرار تخنگ غٹ آ المی ءِ، پارلیمان اٹ السی نمائندہ غاک قوم انا است خواہی تا ترجمانی ءِ کرسا ملکی و قومی مفاد اٹ فیصلہ کیرہ۔ داخیال آتا درشانی ءِ اوفک جہانی یوم پارلیمان نا وخت آ تینا کلہوآتے ٹی کریرہرا اقوام متحدہ نا کنڈآن ورناتے واکدار کننگ نا سرحال آ 30جون آ مچ آ دنیاٹی اڈتننگ انگ ءِ۔ داوخت آ اسپیکر قومی اسمبلی پارے کہ پاکستان نا ساڑی پارلیمان ترقی پسند و روشن خیال واکداری تیا تالان ءِ ہرااہم قومی باندات و الس ءِ مون تروک ویل آتا ایسری کن مثبت کڑد ادا کننگ ءِ۔ اوپارے کہ اپوزیشن پارلیمان نا حسن مریک و پارلیمان نا چاگڑد ءِ سازگار تخنگ و ایلو پارلیمانی باندات آتا سرتننگ اٹ حکومت تون اوار اوار اپوزیشن نا کڑد ہم بھاز اہمیت تخک۔ اوحکومت و اپوزیشن جماعت آتیا اسہ ایلو نا اختلاف آتے گیرام کرسا جمہوری ادارہ غاتا سوگوی و ملک اٹ جمہوریت نا سوگوی کن کڑد ادا کننگ نا گرج آ زور شاغا۔ اسپیکر یوم پارلیمان نا سرحال نا بابت ہیت کرسا پارے کہ پاکستان نا پارلیمان جہانی پارلیمانی یونین(آئی پی یو) و ایلو جہانی پارلیمانی فورم تا اسہ فعال ءُ ممبر اسے و آئی پی یو ینگ پارلیمنٹرین فارم اٹ دانا نمائندگی ساڑی ءِ۔ داوخت آ ڈپٹی اسپیکر قومی اسمبلی قاسم خان سوری پارے کہ پارلیمان جمہوریت نا اسہ اہم ءُ جمہوری ادارہ اسے۔ اوپارے کہ پارلیمان نا سوگوی ملک اٹی جمہوری عمل نا لڑی و شونداری نا ضامن مریک۔ اوپارے کہ ساڑی آ پارلیمان الس نا ویل آتا ایسری کن پبی کانود سازی کننگ ءِ۔ اوحکومت و اپوزیشن جماعت آتیا زور شاغا کہ پارلیمان نا چاگڑد ءِ سازگار کننگ اٹ تینا کڑد ءِ ادا کیر۔ اوملک اٹ ورناتے ٹی شعور تالان کننگ و اوفتے واکدار کننگ کن ینگ پارلیمنٹرین فورم نا کڑد انا ستاءِ کرے۔
