اسلام آباد۔ 29جون (اے پی پی) وزیرخارجہ مخدوم شاہ محمود قریشی پارینے کہ اوغانستان اٹی گڑاس زموار سپائیلرنا کڑد ءِ ادا کننگ ءُ، ہراپاکستان اٹ نزوری خوارہ، جاست وپاستی ادارہ غاک لاہور دھماکہ ٹی ملک دشمن ایجنسی تا کمکاری نا کنڈآ اشارہ کرینو۔ سے شنبے نادے آ لاہور دھماکہ نا جاست وپاست اٹ مون آ بروک آ پیش رفت نا بابت اسہ بیان اسے ٹی وزیر خارجہ انٹیلی جنس ادارہ و پنجاب کاؤنٹرٹیررازم ڈیپارٹمنٹ و پولیس ءِ مبارکبادی ترساپارینے کہ اوفک سائنٹفک وڑاٹ جاست وپاست ءِ مون آ درسا،نئے بیرہ باندات نا تہہ اسکان سرمسر بلکن زموارآتے دزگیر کریر، ننا مستعد ادارہ غاک بھاز کم وخت اٹی ہموفتے پورو وڑاٹ بے نقاب کریر ہراپاکستان ءِ نزور کننگ خوائسرہ۔ شاہ محمود قریشی پارے کہ جاست وپاستی ادارہ غاک دادھماکہ نا پد اٹ ملک دشمن ایجنسی تا کمکاری نا کنڈآ اشارہ کرینو۔ شاہ محمود قریشی پارے کہ ٹیررفنانسنگ نا جاست وپاست کروک آ ادارہ غاک ہم دانا جوان جاست وپاست ءِ بایدے کیر و ہموفتے بایدے بے نقاب کننگے ہراداوڑنا کارروائی تیکن مالی وسیلہ مہیا کننگ ءُ۔ وزیر خارجہ پارے کہ اوغانستان اٹی ہم گڑاس زموار سپائیلرنا کڑد ءِ ادا کننگ ءُ، ہرا پاکستان اٹ نزوری خوارہ۔ اوپارے کہ نن بے پناہ قربانی تسونن و نن تینا سمت ءِ ہم سہی کرینن۔ شاہ محمود قریشی پارے کہ اپوزیشن نا بھلو وخت اسے آن خواست ئس کہ اوفتے قومی سلامتی نا باندات آ پت اٹ ہلنگے۔ حکومت بجٹ آن پد، یکم جولائی آ پیشیم نا 3بجہ غا قومی سلامتی نا بابت اہم دیوان اس بٹنگ نا فیصلہ کرینے۔ دادیوان اٹی پارلیمانی کمیٹی قومی سلامتی ءِ بٹنگ انگانے، داکان بیدس غٹ پارلیمانی جماعت آتیان 16/17پارلیمنٹرین آتے بٹنگ انگ ءِ۔ دیوان ءِ بٹنگ نا مسخت، شرفمند آ باسک آتے اوغانستان و ڈیہہ ٹی امن و ایمنی نا حالیت آتابابت سرجم حوال تننگ و اوفتے راستکی تیان معلومدار کننگ ءِ۔ وزیر خارجہ پیدوار کرے کہ پاکستان ءِ ہمووڑکروئی ءِ ہرااونا فائدہ ٹی ءِ، یاہرااونا گرج ءِ۔ وزیر خارجہ دہشت گرد آتا مالی کمکاری، منی لانڈرنگ نا توننگ و اوغانستان اٹی امن ننا گرج ءِ و نن داڑآ عمل کننگ اُن۔ ہنداخاطرآن نن اوغان امن عمل اٹ تینا خیرخواہی نا کڑد ءِ ادا کننگ اُن۔
