اقوام متحدہ۔ 29جون (اے پی پی) اقوام متحدہ نا سیکرٹری جنرل انتونیوگوتریس بھارت آ زور شاغانے کہ او تینا غیر کانودی کوزہ گیری ٹی جموں و کشمیر اٹی چناتیا پیلٹ گن انا کاریم اٹ اتنگ ءِ بند کے و چناتے اسہ وڑاسے ٹی ہم بھارتی سیکورٹی فورس آتون گنڈنگ نا کوشست کپ۔ کشمیر میڈیا سروس نا رداٹ اقوام متحدہ نا سیکرٹری جنرل داخواست ءِ سلامتی کونسل اٹ ”چناو سلہہ بند تنازعہ“ نا بابت تینا تازہ رپورٹ آ شرہ ٹی کرے۔ رپورٹ اٹ داپیدوار کننگتو کہ بھارت ہراوڑچناتے بھارتی فورس آتون گنڈنگ ءِ۔ رپورٹ اٹ پاننگانے کہ ”جنگ اٹی چناتا حق ءِ گوجالنگ حیران کن و است ءِ سرفوک آ معاملہ ءِ، اسکول و ہسپتال آتے جلہو آتے کن، لٹ وپل اکن بھس کننگک یا فوجی مسخت آتے کن کاریم اٹ اتنگک“۔ بھارت نا بارواٹی دارپورٹ نا اسہ بشخ اسے ٹی پاننگانے کہ تدوک آ سال مقبوضہ جموں و کشمیراٹی جم وڑاٹ 39چناتیا تشدد کننگا ہراڑآن 9چنازوال و 30معذور مسر۔ مقبوضہ علاقہ ٹی مہلک پیلٹ گن آتے اٹ کم از کم 11چناٹھپی مسر۔ رپورٹ اٹ بھارتی فورس آک و نادرست سلہہ بند بندغ آتا کنڈآن بیدادی، دھماکہ خیز مواد آتیان مروک آ ٹھپی، جھیڑہ غاتا نیام اٹ سم کاری، دستی بمب جلہو و کنٹرول لائن نا پار سم کاری نا واقعہ غاک ہم اوار ءُ۔ اقوام متحدہ نا سروک پارے کہ او جموں و کشمیر اٹی چناتا برخلاف سنگین خلاف ورزی تیان فریشان ءِ و اوبھارتی حکومت آن چناتا رکھ اکن گام گیج کننگ نا خواست کرے۔ اوبھارتی حکومت آ زور شاغاکہ او کشمیری چناتا برخلاف پیلٹ گن اناکاریم اٹ اتنگ ءِ بند کے و داہیت ءِ پک کے کہ چناتے ہروڑاٹ بھارتی فورس آتون گنڈنگپ۔ اوبھارت آن داہم خواست کرے کہ او سیف اسکول آتا اعلامیہ و وینکوور نا اصول آتے پک کے ہراطالب علم، استاد، اسکول و یونیورسٹی تے سلہہ بند تصادم نا بدترین اثرآتیان بچفنگ کن حکومت آک عہد کرینو۔ سیکرٹری جنرل چناتا دزگیری، اوفتیا تشدد و اسکول آتا فوجی کاریم اٹ اتنگ آہم گڑتی نا درشانی ءِ کرے۔ اوبھارت ءِ، حراست اٹ ہروڑنا ناروا سلوک ءِ توننگ و چناتا خیال ءِ تخنگ و رکھ انا کانود 2015آ عملدرآمد ءِ پک کننگ و غیرکانودی سرجزآتے کن چناتا کاریم اٹ اتنگ تون مون تننگ آ زور شاغا۔
