جنیوا۔ 29جون (اے پی پی) اقوام متحدہ نا انسانی حق کونسل امریکی پولیس نا دوتے اٹ سیاہ فام نا زوال آن پد مچ آ دنیا ٹی داوڑنا واقعہ غاتا دُوارہ پیش بننگ آن بچنگ کن منظم نسل پرستی ءِ دمدستی وڑاٹ توننگ و ترمیم و تلافی کننگ تون اوار جہانی گام گیج آتیا زور شاغانے۔ برطانوی خبررساں ادارہ نا رداٹ اقوام متحدہ نا انسانی حق انا ہائی کمشنر میشیل بیچلٹ نسل پرستی نا واقعہ غاتیا انسانی حق کونسل نا رپورٹ ءِ جاری کرسا غٹ ریاست آتیا زور شاغاکہ او نسل پرستی نا برخلاف گام گیج آتے پک کیر و افریقی شاری تا توار مریر۔ اوپارے کہ تلافی نا لوز بیرہ امداد اس اف بلکن آخبت اٹ نسل پرستی و نسلی ناانصافی ءِ توننگ نا ضمانت ہم فراوان کننگ ءِ نیز ریاست آتے نسلی انصاف، ازالہ و بریبری کن خاص و معینہ مدآ مبنی پابندی تا کمک اٹ گام گیج آتے ترند کننگ کن سوگو سیاسی واکداری نا درشانی ءِ کننگے و داگام گیج آتے ٹی پالیسی نا اول سرآن جاچ ءِ ہلنگ و فوجداری انصاف نا نظام اٹ اصلاح اوار مریک، ہراڑآن افریقی مخلوق کن آخبتی وڑاٹ امتیازی نتیجہ مون آ بسنے۔