اسلام آباد۔ 28جون (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستان اٹی 250ملکی و 43جہانی چینل آجووڑاٹ تینا کاریم ءِ کننگ ءُ، حکومت و اپوزیشن اٹ پاکستان نا فائدہ غاتیا امنائی سلاہ و یکسانیت بایدے مرے، وزیراعظم عمران خان ءِ ہر ادارہ نا بنداو آن اسہ ماڑی اس جوڑ کروئی تمنگ ءِ، نن تینا ادارہ غاتے سوگو کینہ، وزارت حوالکاری وشینکاری ءِ دنیا ٹی پاکستان نا بیانیہ ءِ مون آ دننگ نا قابل کینہ، مستین اٹ وزارت حوالکاری نا ماتحت ادارہ غاتے ٹی سیاسی بنداوتیا بھرتی تیان اوفتے بھس کننگا، پی ٹی وی، اے پی پی و ریڈیو پاکستان ءِ اگست اسکان پوسکن آ وڑوڈول آتیا اتنگ اُن، نن پی ٹی وی ءِ حکمران جماعت نا جاگہ غا ریاست نا ترجمان اس جوڑ کرینن۔ دوشنبے نادے آ قومی اسمبلی ٹی بنجائی وزیر چوہدری فواد حسین وزارت حوالکاری و شینکاری نا کٹوتی نا تحریک آتیا شرہ ءِ چٹفسا پارے کہ او باسک آتا منت واری ءِ ہرفک ہرافک شرہ ٹی اہم باندات آتے ہرفیر۔ وزیر حوالکاری پارے کہ ایکسٹرنل پبلیسٹی ونگ انا ہیت ءِ کننگا، دادرست ءِ کہ ونگ انا کارکڑد سوج انا نشان ءِ ولے ہروئی دادے کہ دانا سوب انت ءِ۔ اوپارے کہ نن دہشت گردی نا برخلاف جنگ کرین، ای داونگ آن دریافت کریٹ کہ انت دیکی ٹی ننا بیانیہ نا بابت کتاب اس نوشتہ کننگا، جہانی کہول آ ہندن ءُ فلم اس جوڑ کننگا ہراٹی ننا نکتہ نظر پیدوار مرے، اونا ورندی نفی ٹی ئس۔ داکان بیدس جہانی اخبار و انٹرنیشنل میڈیا غا پاکستان نا بیانیہ نا تشہیر نا بابت ہم بیان نفی ٹی ئس۔ اوپارے کہ دانا اسہ سوب داہم ارے کہ پاکستان نا ایکسٹرنل پبلسٹی ونگ انا سالانہ بجٹ چار ءُ نیم کروڑ روپئی وخت اس کہ دانا مقابلہ ٹی ہندوستا ن نا بجٹ 21کروڑ روپئی ءِ۔ اوپارے کہ ساڑی ٹی ہراانفولیب ءِ ہلنگا ہموڑے 845آن زیات جعلی ویب سائٹ پاکستان نا برخلاف پدریسہ پروپیگنڈا کریرہ۔ جہانی میڈیا ءِ پاکستان نا بارواٹ سٹی ءُ خبر تننگاکہ۔ کشمیری تا حق خودارادیت نا جہد آ سوج کننگاکہ، بلوچستان اٹی غٹ نیشنل ازم ءِ مون آ دننگاکہ۔ داکان بیدس تحریک لبیک پاکستان نا برانز اٹی الہ آباد آن 3لکھ ٹویٹ کننگا، داڑآن کساس خلنگ مریک کہ پاکستان نا برخلاف ہراوڑنا جنگ اس کننگ انگ ءِ۔ اوپارے کہ ای داہیت آن اتفاق کیوہ کہ ساڑی آ دور ”وار آف اوپنین“ ءِ۔ دااصل جنگ ءِ و داپاکستان نا جنگ ءِ۔ اوپارے کہ ارٹ میکو ہیت دادے کہ نن داتسکان انت اکن سرمسن، تدوک آ حکومت آک پدریسہ وزارت حوالکاری و شینکاری نا ادارہ غاتے ٹی ہم تینا کارندہ غاتے بھرتی کریر، بیرہ پی ٹی وی ٹی 2200ملازم دہ سال اٹی بھرتی کننگا، اوفتے اول ڈیلی ویجز آ بھرتی کننگا وخت اس کہ اوکان پد اسہ کمیٹی اس جوڑ کرسا اوفتے آخبتی کننگا۔ اوفتا تنخواہ تا بجٹ 32کروڑ روپئی ءِ، دابھرتی کروک آ بندغ آتے ٹی 5درسد ہم کاریم کروک ءُ افس، ہنداوڑ پی ٹی وی نا بھٹہ ءِ تولفنگا و ہنداوڑ ایسوسی ایٹڈ پریس آف پاکستان نا ادارہ ہم پورو تُوس اوپارے کہ ننکن ہم داآسان ءِ کہ نن تینا حلقہ غاتا اسہ اسہ پولنگ اسٹیشن آن دہ دہ بندغ داادارہ غاتے ٹی بھرتی کین و ولدا گچین کاری تے کٹن۔ ریلوائی و اسٹیل مل آتا بیڑہ ءِ غرق کننگا۔ اوپارے کہ وزیراعظم عمران خان ءِ ہر ادارہ نا بنداو آن اونا پوسکن آ ماڑی ءِ جوڑ کروئی تمنگ ءِ۔ اوپارے کہ اگست نا اولیکو ہفتہ ٹی پاکستان ٹیلی ویژن ءِ پورو ایچ ڈی کننگک۔ ہنداوڑ اولیکو وار مخلوق اودے ایچ ڈی آ ہُننگ کیک۔ ایسوسی ایٹڈ پریس آف پاکستان (اے پی پی) ءِ ایف پی و رائٹرز آتا وڑآ ڈیجیٹل میڈیا نیٹ ورک اس جوڑ کینہ۔ اودے اگست اسکان جہانی آب آ اتنگ کن گام گیج آتا بناءِ کننگک۔ ریڈیوپاکستان ءِ پورو وڑاٹ ڈیجیٹلائز کننگ اُن۔ پوسکن آ پروگرامنگ نا بنااگست اٹ مریک۔ وزیرحوالکاری پارے کہ داڑے صحافی تا رکھ انا ہیت ءِ کننگا، دابنداو آ پدریسہ جہانی پروپیگنڈا ءِ سیبو تننگ انگ ءِ۔ گڑاس داپروپیگنڈانا گواچی مننگ ءُ۔ اوپارے کہ صحافی تیا غٹ آن زیات جلہو پاکستان پیپلزپارٹی نا دوراٹی مس۔ دادوراٹی کل 39جلہو آتے ٹی 32صحافی تینا جان تیان ہنار۔ پاکستان مسلم لیگ (ن) نا دور اٹی 18جلہو آتے ٹی 14صحافی جان آن ہنار وخت اس کہ ننا دور اٹی ہشت جلہو مس ہراٹی 2آن بیدس غٹ جلہو آتا جاست وپاست کننگا و ڈوہدار تے ہلنگا۔
