ناران۔ 28جون (اے پی پی) وزیراعظم عمران خان پارینے کہ پاکستان سویٹزرلینڈ آن زیات زیبا ءُ ملک اسے، سیل و سوات آن ملک اٹ پیسہ بریک و الس ءِ روزگار ملک، شجرکاری و چاگڑد نا رکھ اکن گارڈز و خیال تخوک ءُ ہندی آبادی آن تخنگے، کچٹی آن رکھ اکن کانود آ سختی اٹ عمل کرفنگے۔ داخیال آتا درشانی ءِ او دوشنبے نادے آ ناران نا دورہ ٹی ٹائیگر فورس آن تران کرسا کرے۔ وزیراعظم پارے کہ ای علاقہ ٹی زیات شجرکاری ءِ خناٹ بھاز خوش مسوٹ۔ کلین اینڈ گرین پاکستان ننا ویژن ءِ۔ ننے بروک آ چین تیکن سرسوز و شاداب و ساف ستھرا پاکستان اس ہلسا ہنوئی ءِ، بروک آ چینک داڑآننا منت وار مریرہ۔ وزیراعظم پارے کہ بدبختی اٹ ننا بزرگ آک انصاف کتور و درخت و جنگل آتے بھس کریر و بروک آ چین تا بارواٹ سجفتوس۔ اوپارے کہ ننکن دااسہ چیلنج اسے کہ ننے چاگڑد ءِ گچین کروئی ءِ۔ وزیراعظم پارے کہ اومچ آ دنیاغا ہنانے دنیا ٹی شاید ناران، کاغان آنبار ءُ زیبا ءُ جاگہ مروئے۔ نن دانعمت آتیا بایدے اللہ نا شکر ءِ اداکین و دانا گچین انگا وڑوڈول دادے کہ نن دافتاخیال ءِ تخن و اوفتا رکھ ءِ کین۔ وزیراعظم علاقہ نا کمشنر نا کنڈآن تروک آ حوال نا ستاءِ کرسا پارے کہ شجرکاری و چاگڑد کن گارڈز و خیالداری ہندی مخلوق آن گچین کننگے۔ اوپارے کہ دریائے کنہار اٹ گندگی تے خسنگک ہرادے توننگ کن سختی اٹ کانود آ عملدرآمد کرفنگے۔ وزیراعظم پارے کہ ملک اٹ سیل و سوات ترندی اٹ شون ہلنگ ءِ ولے دااسہ چیلنج اسے کہ نن سفائی و چاگڑد نا رکھ ءِ پک کین و کچرہ تے سہی وڑاٹ اوفتا جاگہ غا خسن۔ وزیراعظم پارے کہ دریائے کنہار نا پنی آ ٹراؤٹ مچھی ءِ مچ آ پاکستان اٹ پسند کننگک دانا رکھ و پیدوار ءِ ودفنگ آ چکار کننگے۔ وزیراعظم پارے کہ سیل وسوات آن ملک اٹ پیسہ بریک و الس ءِ روزگار ملک۔ سوئٹزرلینڈ ہراننا مقابلہ ٹی بھاز چنکو ملک اسے سیل و سوات آن 80ارب ڈالر کٹک وخت اس کہ ننا کل برآمد آک 25ارب ڈالر ءُ۔ سوئٹزرلینڈ آن زیات زیبائی داعلاقہ غاتے ٹی ارے ولے نن اوفتا رکھ ءِ کپنہ۔ ننے داڑآچکارکروئی ءِ و تینا سیل وسواتی علاقہ غاتا خاص وڑاٹ خیال ءِ تخوئی ءِ۔ داکان مست وزیراعظم ءِ علاقہ نا کمشنر ریاض خان سیل و سوات و چاگڑدی رکھ اکن کروک آ گام گیج و ڈٹ آتا بارواٹ حوال تس۔
