اسلام آباد۔ 28جون (اے پی پی) صدر مملکت ڈاکٹر عارف علوی مسیت آتے ٹی اہم راجی سرحال آتیا اسلامی تعلیمات آتے پیدوار کننگ نا گرج آ زور شاغسا پارینے کہ عالم دینک میرات آتے ٹی زالبول آتا حق، ودوک آ آبادی و جان جوڑی نا ویل آتا بابت آگاہی ودی کننگ اٹ تینا کڑد ءِ ادا کیر۔ داخیال آتا درشانی ءِ او دوشنبے نادے آ مرکزی رویت ہلال کمیٹی نا ڈل انا چیئرمین مولانا عبدالخبیر آزاد نا کماشی ٹی اوڑدہی ٹی کرے۔ صدر مملکت پارے کہ عالم دینک مسیت آتا کمک اٹ مخلوق اٹ اہم راجی سرحال آتیا اسلام نا تعلیمات آتے پیدوار کیر، اسلام غٹ آن مست زالبول آتے میرات نا حق تس، عالم دینک میرات اٹی زالبول آتا حق آ مسیت آتا کمک اٹ مخلوق اٹ آگاہی ودی کیر، اوپارے کہ عالم دینک ودوک آ آبادی و جان جوڑی نا ویل آتا بابت مخلوق ءِ تعلیم ایتر، اوپارے کہ عالم دینک راجی اصلاح و اخلاقی قدر انا مون آ دننگ کن کاریم کیر، عالم دینک منبرومحراب نا کمک اٹ بین المذاہب و بین المسالک ہم آہنگی ءِ مون آ دیر، عالم دینک کورونا ٹی مخلوق اٹ آگاہی ودی کننگ، ایس او پی تیا عملدرآمد اٹ اہم ءُ کڑد اس ادا کریر، صدر مملکت غٹ رویت ہلال کمیٹی تے فعال کننگ آ چیئرمین، مرکزی رویت ہلال کمیٹی نا کڑد انا ستاءِ کرے۔ اوڑدہی ٹی مرکزی رویت ہلال کمیٹی، زونل رویت ہلال کمیٹی نا باسک آک و بڑزکوکمامدارآک ہم ساڑی ئسر۔
